​ចក្រភពអង់គ្លេស៖ លោក Graham Brady ប្រធាន​ក្រុម​សមាជិកសភា​គណបក្ស​អភិរក្សនិយម​ដ៏​មាន​ឥទ្ធិពល ដែល​ត្រូវបាន​គេ​ស្គាល់​ថា​ គណៈកម្មាធិការ​ 1922 បាន​និយាយ​កាលពី​ថ្ងៃ​ចន្ទ​ថា លោក​រំពឹងថា ​អ្នក​បន្ត​តំណែង​របស់​នាយករដ្ឋមន្ត្រី​អង់គ្លេសលោក Boris Johnson នឹងត្រូវ​បានប្រកាស​នៅ​ថ្ងៃទី5 ខែកញ្ញា​។​

​លោក Brady បាន​និយាយ​ទៅកាន់​អ្នកសារព័ត៌មាន​នៅ​ទីក្រុង Westminster ថា ​ការជ្រើសរើស​ឲ្យ​ឈរឈ្មោះ​បេក្ខជន​នឹង​បើក​ហើយ​បិទ​ជា​ផ្លូវការនៅ​ថ្ងៃ​អង្គារ​នេះ​។​ ​ការបោះឆ្នោត​ជុំ​ទី​1 នឹង​ប្រព្រឹត្តទៅ​នៅ​ថ្ងៃ​ពុធ ហើយ​លើក​ទី​2 ​នៅ​ថ្ងៃ​ព្រហស្បតិ៍ ដោយ​បេក្ខជន​ដែល​មិន​បានទទួល​យ៉ាងតិច ​30​សំឡេងត្រូវ​ជំ​រុះ​ចោល​ក្នុង​ជុំ​នីមួយៗ​។​ ​បេក្ខជន​នឹងត្រូវ​ជ្រើសរើស​ដោយ​សមាជិកសភា​យ៉ាងតិច​ 20​រូបលើ​សន្លឹកឆ្នោត​ដំបូង ជា​ចំនួន​ដែល​អាច​ទម្លាក់​គូប្រជែង​មួយចំនួន​មុនពេល​ការបោះឆ្នោត​ចាប់ផ្តើម​។ គណបក្ស​នេះ​មានបំណង​បញ្ចប់​ដំណាក់កាល​បោះឆ្នោត​សភា​ មុនពេល​សមាជិក​សភា​​សម្រាក​នា​រដូវក្តៅ​នៅ​ថ្ងៃទី21 កក្កដា​។ នោះ​មានន័យថា មេដឹកនាំ​ថ្មី​ត្រូវបាន​គេ​រំពឹងថា​ នឹងត្រូវ​ប្រកាស​នៅពេល​សភា​ត្រឡប់​មកពី​ការ​សម្រាក​នារដូវក្តៅ​វិញ​ក្នុង​ខែកញ្ញា​។

​ក្រុម​អ្នក​អភិរក្សនិយម​ជាច្រើន​នាក់មានការ​ប្រុងប្រយ័ត្ន​ពី​ការ​ទុក​ឲ្យ​លោក Johnson នៅក្នុង​តំណែង​យូរពេក​ទាក់ទង​នឹង​មេដឹកនាំ​ខ្សោយ​គឺជា​រឿង​ចុងក្រោយ ​ដែល​អង់គ្លេស​ត្រូវការ​ដោះស្រាយ​សង្គ្រាម​កំពុង​ឆាបឆេះ​នៅ​អ៊ុយ​ក្រែ​ន តម្លៃ​អាហារ និង​ថាមពល​ឡើងថ្លៃ ដែល​ជំរុញឱ្យមាន​អតិផរណា​ឈានដល់​កម្រិត​មិន​ធ្លាប់​ជួបប្រទះ ​ក្នុង​ប៉ុន្មាន​ទសវត្សកន្លងទៅនេះ និង​ការកើនឡើង​ភាពចលាចល​លើ​ការងារ​។​ ​មន្ត្រី​មួយចំនួន​បារម្ភ​ថា ​លោក ​Johnson ត្រូវបាន​គេ​ឲ្យ​លាលែង​ពី​តំណែង​ដោយសារ​រឿងអាស្រូវ​ជាច្រើន ​មានដូចជាបញ្ហា​ថវិកា ការបំពាន​វិធានការ និង​ការដោះស្រាយរបស់លោក​ ចំពោះ​ការចោទប្រកាន់​ពីបទ​ប្រព្រឹត្តិ​ខុស​លើផ្លូវ​ភេទ​មកលើ​សមាជិក​សភា៕

អត្ថបទ៖ ប៊ុនថន