ភ្នំពេញ៖ ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ នៅព្រឹកថ្ងៃទី១២ ខែកក្កដា ឆ្នាំ២០២២នេះ បានអញ្ជើញចូលរួមគោរពវិញ្ញាណក្ខន្ធអតីតនាយករដ្ឋមន្ត្រីជប៉ុន ឯកឧត្តម Shinzo Abe នៅស្ថានទូតជប៉ុនប្រចាំកម្ពុជា ខណៈស្ថានទូតជប៉ុននៅកម្ពុជាបើកទទួលសាធារណជនដែលមានបំណងចូលរួមរំលែកទុក្ខ ចំពោះសពឯកឧត្ដម អាបេ។
សា្ថនទូតជប៉ុននៅភ្នំពេញ និងការិយាល័យកុងស៊ុលជប៉ុនប្រចាំខេត្តសៀមរាប បានបើកទទួលសាធារណជន ចូលរួមសរសេរសាររំលែកទុក្ខ ចំពោះមរណភាពរបស់អតីតនាយករដ្ឋមន្រ្តីជប៉ុន ឯកឧត្តម អាបេ ស៊ីនហ្សូ នៅតាមទីតាំង និងកាលបរិច្ឆេទមួយចំនួនចាប់ពីថ្ងៃនេះរហូតដល់ថ្ងៃទី១៦ ខែកក្កដានេះ។
ក្រោយពីប្រកាសបើកឲ្យសាធារណជនចូលគោរពវិញ្ញាណក្ខន្ធសព ឯកឧត្តម ស៊ីនហ្សូ អាបេ មានថ្នាក់ដឹកនាំកំពូលៗរបស់កម្ពុជា និងថ្នាក់ដឹកនាំក្រសួងស្ថាប័ននានា រួមទាំងបងប្អូនប្រជាពលរដ្ឋខ្មែរបានអញ្ជើញទៅគោរពវិញ្ញាណក្ខន្ធឯកឧត្តមជាបន្តបន្ទាប់ ដោយបានចារនៅក្នុងក្រាំងមាសសម្តែងការសោកសៅ និងរន្ធត់ជាពន់ពេក។
ឯកឧត្តម ស៊ីនហ្សូ អាបេ អតីតនាយករដ្ឋមន្រ្តីជប៉ុន បានទទួលមរណភាពក្នុងវ័យ៦៧ឆ្នាំ ការបាត់បងជីវិតរបស់រដ្ឋបុរសជប៉ុនរូបនេះ ដោយសារតែជនទុច្ចរិតបានបាញ់ប្រហារយ៉ាងព្រៃផ្សៃ កាលពីថ្ងៃទី៨ ខែកក្កដា ឆ្នាំ២០២២កន្លងទៅថ្មីៗនេះ ខណៈដែលឯកឧត្តមបានកំពុងថ្លែងសុន្ទរកថាឃោសនាមួយនៅទី ក្រុងណារ៉ាប្រទេសជប៉ុន។ ក្រោយពីឮដំណឹងចំពោះមរណភាពឯកឧត្តម ស៊ិនហ្សូ អាបេនេះ ថ្នាក់ដឹកនាំបណ្តាពិភពលោក រួមទាំងថ្នាក់ដឹកនាំកម្ពុជា អ្នកនយោបាយជាន់ខ្ពស់កម្ពុជា និងប្រជាជនកម្ពុជា បានចូលរួមចំពោះមរណទុក្ខដ៏គួរឲ្យរន្ធត់មួយនេះ។
ជាមួយនឹងមរណភាពរបស់ឯកឧត្តម ស៊ីនហ្សូអាបេនេះ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានប្រកាសឲ្យមានការកាន់ទុក្ខនៅទូទាំងប្រទេសកម្ពុជា ដោយប្រកាសឲ្យមានការបង្ហូតទង់ជាតិពាក់កណ្តាលដង នាថ្ងៃអាទិត្យទី១០កក្កដាផងដែរ ដោយសម្តេចតេជោនាយករដ្ឋមន្រ្តីបានថ្លែងថាមរណភាពរបស់ឯកឧត្តម អាបេ ស៊ិនហ្សូ មិនត្រឹមតែជាការបាត់ប្រកបដោយភាពសោកស្តាយ តក់ស្លុត រន្ធត់ និងអាឡោះអាល័យសម្រាប់តែប្រជាពលរដ្ឋជប៉ុនប៉ុណ្ណោះ តែសម្រាប់ប្រជាពលរដ្ឋនៅលើពិភពលោក រួមទាំងប្រជាពលរដ្ឋកម្ពុជាផងដែរ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
