​ប៉េតង់៖ កីឡាការិនី​ប៉េតង់​ជម្រើសជាតិ​កម្ពុជា អ៊ុក ស្រីមុំ បាន​យកឈ្នះ​មេដាយមាសនៃ​ការប្រកួត​កីឡា​ពិភពលោក​ The World Games 2022 ​នៅ​ទីក្រុង​ Birmingham ​រដ្ឋ​អាល​ឡា​បា​មា សហរដ្ឋអាមេរិក បន្ទាប់ពី​យកឈ្នះ​កីឡាការិនី​ម្ចាស់ផ្ទះ​ Rebeka HOWE ​ដោយ​លទ្ធផល ៤១-២១​ពិន្ទុលើ​វិញ្ញាសា​វាយយក​ពិន្ទុក្នុង​វគ្គ​ផ្ដាច់ព្រ័ត្រកាលពី​ល្ងាច​ថ្ងៃទី​១២ ខែកក្កដា នៅ​អាមេរិក ត្រូវ​នឹង​ព្រឹក​ថ្ងៃទី​១៣ ខែកក្កដា ឆ្នាំ​២០២២ ពេលវេលា​នៅ​កម្ពុជា។​

​សម្រាប់​ការបង្ហាញ​ខ្លួន​លើកដំបូងក្នុង​ព្រឹត្តិការណ៍​កម្រិត​ពិភពលោក​នេះ កីឡាការិនី​កម្ពុជា អ៊ុក ស្រីមុំ បាន​ឈរ​ចំណាត់ថ្នាក់​លេខ​៣ សម្រាប់​ការប្រកួត​សន្សំ​ពិន្ទុ​ក្នុង​ជុំ។ ប៉ុ​ន្ដ​ឈានដល់​វគ្គ​ខ្វែង ឬ​វគ្គ​ពាក់កណ្ដាល​ផ្ដាច់ព្រ័ត្រ ម្ចាស់​មេដាយមាស​ពិភពលោកឆ្នាំ​២០២១ រូបនេះធ្វើបាន​យ៉ាង​ល្អដោយបាន​ទម្លាក់​កីឡាការិនី​ដា​ណឺ​ម៉ាក​ Katrine JUNGE ​ក្នុង​លទ្ធផល ៣៧-២៣​ពិន្ទុ ខណៈ​កីឡាការិនី​អាមេរិកបាន​យកឈ្នះ​កីឡាការិនី​ថៃ ដើម្បី​ឡើងមក​ជួប​កីឡាការិនី​កម្ពុជា នៅ​វគ្គ​ផ្ដាច់ព្រ័ត្រ​តែម្ដង។​ ​ឈានដល់​វគ្គ​ដណ្ដើម​មេដាយមាស​នេះ អ៊ុក ស្រីមុំ ធ្វើបាន​កាន់តែ​ល្អ​បន្ថែមទៀតជាមួយ​ការយក​ឈ្នះ​កីឡាការិនី​ម្ចាស់ផ្ទះ​ Rebeka HOWE ​ដាច់​រហូតដល់ ៤១-២១​ពិន្ទុដើម្បី​គ្រង​មេដាយ​មេដាយមាស​លើ​វិញ្ញាសា​វាយយក​ពិន្ទុ​ផ្នែក​នារីនៃ​ព្រឹត្តិការណ៍​ The World Games 2022 ​តែម្ដង។​

​នេះ​គឺជា​លើកដំបូង​ហើយដែល​កម្ពុជា​បាន​បញ្ជូន​កីឡាការិនី​ប៉េតង់ ចូលរួម​ការប្រកួត​កីឡា​ពិភពលោកនៅ​អាមេរិក។ ប៉ុន្ដែ​កីឡាការិនី អ៊ុក ស្រីមុំ នៅសល់​ភារកិច្ច​មួយទៀតដោយ​ត្រូវ​ចាប់ដៃ​ជាមួយ​សិស្ស​ប្អូន អ៊ុន ស្រី​យ៉ា ប្រកួត​វិញ្ញាសា​វាយ​គូ​នារី ២​នាក់ទល់ ២​នាក់ដែល​គ្រោង​នឹងធ្វើ​ការប្រកួត​នៅ​ថ្ងៃទី​១៤ ខែកក្កដា ឆ្នាំ​២០២២ ស្អែក​នេះត្រូវ​នឹង​ពេលវេលា​នៅ​កម្ពុជា៕

​អត្ថបទ៖ លី ឈុន​ឡា