ភ្នំពេញ៖ ប្រជាពលរដ្ឋបានសម្រុកមកចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងដូសជំរុញ នៅមណ្ឌលសុខភាពទួលគោក ខណ្ឌទួលគោក រាជធានីភ្នំពេញ បន្ទាប់ពីករណីឆ្លងកូវីដ-១៩ កើនឡើងបន្តិចបន្តួច។

បើតាមលោក ប៉ាវ សំអាត អ្នកសម្របសម្រួលទូទៅនៃដំណើរការចាក់វ៉ាក់សាំងបង្ការជំងឺកូវីដ-១៩ មណ្ឌលសុខភាពទួលគោក ខណ្ឌទួលគោក រាជធានីភ្នំពេញ តាមរយៈបណ្តាញBTV ព័ត៌មាន នាព្រឹកថ្ងៃទី១៣ ខែកក្កដា ឆ្នាំ២០២២នេះថា ដោយហេតុថា មួយរយៈចុងក្រោយនេះ ប្រទេសកម្ពុជា មានការទទួលឆ្លងករណីថ្មីនៃជំងឺកូវីដ១៩កើនឡើងបន្តិចបន្តួច។

ជាពិសេសប្រមុខរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា បានអំពាវនាវ ​និងណែនាំអនុសាសន៍ បន្ទាប់ពី​មានការ​ឆ្លងកូវីដ១៩ ឡើងវិញបន្តិច សូមអញ្ជើញប្រជាពលរដ្ឋទាំងអស់ ​មកចាក់វ៉ាក់សាំងបង្ការជំងឺកូវីដ-១៩ នៅ​មណ្ឌលសុខភាពទួលគោក គឺក្រុមគ្រូពេទ្យរងចាំចាក់ជូនជារៀងរាល់ថ្ងៃ។

ទន្ទឹមគ្នានោះដែរ អាណាព្យាបាលនាំកូនៗ​មកចាក់វ៉ាក់សាំងដូសមូលដ្ឋាន និងប្រជាពលរដ្ឋ​មក​ចាក់វ៉ាក់សាំង​ដូសជំរុញ បានថ្លែងអំណរគុណជាទីបំផុតចំពោះការយកចិត្តទុក​ដាក់របស់​សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ដែល​បានខិត​ខំ​ស្វែងរកវ៉ាក់សាំងចាក់ជូនប្រជាពលរដ្ឋ និងកុមារ ពីដូសទី១​ រហូតដល់ដូសទី៥ ដើម្បីកាត់ផ្តាច់ការ​ចម្លង​មេរោគដ៏កាចសាហាវនេះ។

ជាចុងក្រោយលោក ប៉ាវ សំអាត បានបញ្ជាក់ទៀតថា ក្រៅពីការចាក់វ៉ាក់សាំងនៅទីតាំង​មណ្ឌល​សុខភាព​ទួលគោកហើយនោះ ក្រុមការងារគ្រូពេទ្យ ​សហការជាមួយអាជ្ញាធរមូលដ្ឋានភូមិ ​សង្កាត់ បន្តចុះចាក់វ៉ាក់សាំងតាមខ្នងផ្ទះប្រជាពលរដ្ឋ ​ដើរពីផ្ទះមួយទៅផ្ទះមួយ ​ក៏ជាដូចជានៅតាមសាលា ផ្សារ តំបន់រោងចក្រ​ និងទីប្រជុំជននានា ​ដោយចាក់វ៉ាក់សាំងបង្ការជំងឺកូវីដ-១៩​ ជូនកុមារ យុវវ័យ និងប្រជាពលរដ្ឋ​ ឲ្យបានចំនួនច្រើនលឿនបំផុត ​និងគ្រប់ៗគ្នា​ ដើម្បីបង្កើនភាពស៊ាំក្នុងសហគមន៍ កាត់​បន្ថយអត្រាឈឺធ្ងន់ និងអត្រាស្លាប់​ដែលបង្កដោយជំងឺកូវីដ-១៩៕ អត្ថបទ រដ្ឋា