កោះកុង៖ អាជ្ញាធរ​​ស្រុកស្រែអំបិល បាននឹងកំពុងចុះអន្តរាគមន៍សង្រ្គោះដោះស្រាយជូនពលរដ្ឋ ក្រោយកម្លាំងទឹកហូរបុកផ្តាច់ផ្លូវលំជនបទ១កន្លែងនៅភូមិព្រះអង្គកែវ ឃុំដងពែង។

លោក ជា ចាន់កញ្ញា អភិបាលស្រុកស្រែអំបិល បានប្រាប់ទូរទស្សន៍BTV នៅវេលាម៉ោង៣និង៤០នាទីរសៀលថ្ងៃទី១៣ ខែកក្កដានេះបានចាត់ចែងអភិបាលរង កម្លាំងអាជ្ញាធរ នគរបាល កងរាជអាវុធហត្ថ មន្រ្តីរដ្ឋបាល និងមេឃុំភូមិ ដឹកជញ្ចូនទូក ឈើក្តារ និងសម្ភារៈមួយចំនួនទៀតបម្រើដល់ការសង្រ្គោះគ្រោះធម្មជាតិទៅកាន់ទីតាំងផ្លូវលំបាកស្រុតនោះហើយ។

បន្ថែមលើនេះ លោកអភិបាលស្រុកស្រែអំបិល ក៏សុំកិច្ចអន្តរាគមន៍ពីមន្ទីរអភិវឌ្ឍន៍ជនបទខេត្ត ដើម្បីសម្រួលធ្វើយ៉ាងណាអាចតភ្ជាប់ផ្លូវធ្វើចរាចរណ៍ឡើងវិញ ប៉ុន្តែឥឡូវនេះទឹកហូរខ្លាំងពុំទាន់ធ្វើអ្វីបាននៅឡើយទេ ដោយគ្រាន់តែយកទូកតូចធំចម្លងប្រជាពលរដ្ឋទៅមកជាបណ្តោះអាសន្នសិន។

លោក ជា ចាន់កញ្ញា ពន្យល់ដែរថា ៣ថ្ងៃមកនេះ បរិមាណទឹកភ្លៀងធ្លាក់ច្រើនបានហូរធ្លាក់ពីលើភ្នំចុះមកក្នុងភូមិសាស្រ្តភូមិឃុំដាច់ស្រយោល។ ជាក់ស្តែង ផ្លូវលំជនបទនៅម្តុំវត្តស្ទឹងពង្រូល ភូមិព្រះអង្គកែវ ឃុំដងពែង ត្រូវបានបាក់ដាច់ពិបាកធ្វើដំណើរស្ទើរតែជារៀងរាល់ឆ្នាំ។ ទោះយ៉ាង គ្រោះធម្មជាតិនេះ មិនបង្កគ្រោះថ្នាក់ដល់អាយុជីវិតប្រជាពលរដ្ឋ ឬលិចលង់ខ្លាំងផ្ទះសម្បែងនោះទេ។

គិតមកទល់ម៉ោងនេះ ក្រុមអាជ្ញាធរ មេឃុំភូមិ និងសមត្ថកិច្ចពាក់ព័ន្ធ កំពុងចុះពិនិត្យស្វែងរកទីទួលសុវត្ថិភាពសម្រាប់ពលរដ្ឋ និងសត្វគោក្របីរបស់ពលរដ្ឋ ករណីស្ថានការណ៍កាន់តែ​អាក្រក់ណាមួយ។ ខណៈគ្រាប់ទឹកភ្លៀងបន្តធ្លាក់ឥតដាច់។ 

លោក សុខ សុទ្ធី អភិបាលរងខេត្តកោះកុង កាលពីថ្ងៃទី១២ ខែកក្កដា ម្សិលមិញថា ខេត្តមិនទាន់មានរបាយការណ៍ណាមួយ ពីការរងផលប៉ះពាល់ដោយសារគ្រោះធម្មជាតិនេះនៅឡើយទេ តែលោកស្នើសុំពលរដ្ឋចូលរួមបង្កើនការប្រុងប្រយ័ត្នខ្ពស់ ប្រសិនបើចាំបាច់ប្រញាប់ផ្តល់ព័ត៌មាន មកកាន់​អាជ្ញាធរមូលដ្ឋានដឹងជាមុន ដើម្បីជួយសង្រ្គោះបានទាន់ពេលវេលា។ រីឯអាជ្ញាធរ​ក៏ត្រូវត្រៀមសម្ភារៈមធ្យោបាយ ចុះជួយពលរដ្ឋភ្លាមៗផងដែរ៕ ​អត្តបទ ៖ ឈឹម មករា