ក្រចេះ ៖ បុរសម្នាក់ បានស្លាប់បាត់បង់ជីវិត និងបុរសម្នាក់ទៀត ត្រូវបានអ្នកភូមិជួយ សង្គ្រោះទាន់ពេលវេលា បន្ទាប់ពីជាប់គាំងក្នុងអណ្តូងទឹកមួយកន្លែង ដោយសារគ្មាន ខ្យល់ឧស្ម័នអ៊ុកស៊ីនសែន ។ 

ឧប្បត្តិហេតុ ដ៏គួរឲ្យរន្ធត់នេះ បានកើតឡើងកាលពីវេលាម៉ោងប្រមាណជា ៧និង០០នាទី ព្រឹកថ្ងៃទី៣០ ខែមិនា ឆ្នាំ២០២១ នៅចំនុចភូមិអញ្ចាញ ឃុំដារ ស្រុកចិត្របុរី ខេត្តក្រចេះ ។ ជនរងគ្រោះមានឈ្មោះ ឃីន ជឿន ភេទប្រុស អាយុ ៥០ឆ្នាំ មុខរបរ កសិករ រស់នៅភូមិឃុំកើតហេតុខាងលើ (ស្លាប់) និងជនរងគ្រោះម្នាក់ទៀតឈ្មោះ ប្រុញ ឡុច ភេទប្រុស អាយុ ៤៦ឆ្នាំ មុខរបរកសិករ រស់នៅភូមិឃុំកើតហេតុជាមួយគ្នា (សន្លប់បាង់បង់ស្មារតី) ។

ប្រពភពីប្រជាពលរដ្ឋនៅកន្លែងកើតហេតុ បានអោយដឹងថា នៅមុនពេលកើតហេតុ ជនរងគ្រោះឈ្មោះ ឃីន ជឿន បានយកបង្អោងឫស្សីដាក់ក្នុងអណ្ដូងតៅនៅក្រោយផ្ទះ ចម្ងាយប្រហែល ១០ម៉ែត្រ ដែលមានជម្រៅ ៦ម៉ែត្រ ដើម្បីយកក្បាលទុយោបូមទឹក ហើយអត់មានខ្យល់អុកស៊ីសែន ក៏បណ្តាលឲ្យស្លាប់នៅក្នុងអណ្ដូងតែម្ដង ។ ពេលឃើញ ឪពុកមានសភាពបែបនោះ កូនស្រី របស់ជនរងគ្រោះក៏បានស្រែកហៅអ្នកភូមិអោយជួយ ជនរងគ្រោះផង ។ ពេលនោះ បុរសឈ្មោះ ប្រុញ ឡុច និងឈ្មោះ តុងអ៊ី ក៏បានទៅដល់ ហើយឈ្មោះ ប្រុញ ឡុច ក៏បានចុះទៅជួយ ស្រាប់តែសន្លប់បាត់ស្មារតី នៅក្នុងអណ្តូងទឹកនោះតែម្តង ដោសារមូលហេតុ គ្មានខ្យល់ឧស្ម័នអ៊ុកស៊ីសែន (ដោយអ្នកភូមិបានធ្វើការពិសោធន៍ដោយយកភ្លើងទៀនដាក់ចូលក្នុងអណ្តូងទឹកនោះ) ។ ពេលនោះអ្នកភូមិក៏ផ្អើលឈូរឆរទៅជួយសង្គ្រោះអ្នកទាំងពីរ និងបានបញ្ជូនជនរងគ្រោះ ឈ្មោះ ឃីន ជឿន ទៅសង្គ្រោះនៅមន្ទីរពេទ្យបង្អែកខេត្តក្រចេះ ប៉ុន្តែជាអកុសលជនរងគ្រោះ ឈ្មោះ ឃីន ជឿន បានស្លាប់បាត់បង់ជីវិត និងម្នាក់ទៀតត្រូវបានអ្នកភូមិជួយសង្គ្រោះ ទាន់ពេលវេលា ។ 

បច្ចុប្បន្ន សពជនរងគ្រោះត្រូវបានក្រុមគ្រួសារប្រារព្ធធ្វើពិធីបុណ្យសពតាមទំនៀម ទំលាប់ប្រពៃណីនៃពិធីបុណ្យព្រះពុទ្ធសាសនា ៕ អត្ថបទ៖ សេង ម័រ