ភ្នំពេញ ៖ នគរបាលបញ្ជូនខ្លួនជនជាតិចិន ចំនួន១១នាក់ទៅតុលាការ ពាក់ព័ន្ធករណកែច្នៃផលិតគ្រឿងញៀនជិត២តោន និងសារធាតុគីមី ជាង ២៧៦តោន 

នគរបាលនៃមន្ទីរប្រឆាំងគ្រឿងញៀន បានបញ្ជូនខ្លួនជនជាតិចិន ចំនួន ១១នាក់ ទៅអយ្យការអមសាលាដំបូងរាជធានីភ្នំពេញ នៅថ្ងៃទី១៣ ខែកក្កដា ឆ្នាំ២០២២ ដើម្បីបន្តនីតិវិធីច្បាប់ ពាក់ព័ន្ធករណីរឹបអូសសារធាតុញៀនជាង ១,៨០តោន និងសារធាតុគីមី ជាង ២៧៦តោន នៅរាជធានីភ្នំពេញ ស្វាយរៀង ព្រៃវែង និងខេត្កណ្តាល។

ការចាប់ខ្លួនក្រុមគ្រឿងញៀននេះធ្វើឡើងជាបន្តបន្ទាប់ពីថ្ងៃទី ០៤ដល់ថ្ងៃទី០៩ ខែកក្កដា ឆ្នាំ២០២២ ដោយនគរបាលមន្ទីរប្រឆាំងគ្រឿងញៀន ការិយាល័យក១ ដឹកនាំដោយលោក ឧត្តមសេនីយ៍ទោ អ៊ិន សុង នាយករងមន្ទីរ និង សហការជាមួយកម្លាំងជំនាញគយប្រចាំការនៅកំពង់ផែអន្តរជាតិភ្នំពេញ ស្នងការដ្ឋាននគរបាលរាជធានីភ្នំពេញ ស្វាយរៀង ព្រៃវែង និងខេត្តកណ្តាល ដែលមានការសម្របសម្រួលដោតអយ្យការអមសាលាដំបូងរាជធានីភ្នំពេញ អយ្យការអមសាលាដំបូងខេត្តកណ្តាលលោក អយ្យការអមសាលាដំដូងខេត្តស្វាយរៀង និងអយ្យការអមសាលាដំបូងខេត្តព្រៃវែង ។  

សូមបញ្ជាក់ថា ករណីនេះសមត្ថកិច្ចបានបើកការស៊ើបអង្កេតអស់រយៈពេលជាង៣ខែ លុះដល់ថ្ងៃទី០៤ ខែកក្កដា ឆ្នាំ២០២២ បានបើកប្រតិបត្តិការបង្ក្រាបក្រុមឧក្រិដ្ឋជនកែច្នៃផលិតដោយខុសច្បាប់នូវសារធាតុញៀន និងរក្សាទុកដោយខុសច្បាប់នូវសារធាតុគីមីផ្សំ ចំនួន ១២គោលដៅផ្សេងៗគ្នាជាបន្តបន្ទាប់ នៅរាជធានីភ្នំពេញ ០៧គោលដៅ ខេត្តស្វាយរៀង០២គោលដៅ ខេត្តព្រៃវែង០១គោលដៅ ខេត្តកណ្តាល០២គោលដៅ ក្នុងនោះមាន ទីតាំងកែច្នៃ ផលិត១ទីតាំង និងស្តុកទុកចំនួន ៦ទីតាំង។

ក្នុងរង្វងប្រតិបត្តិការកម្លាំងនគរបាលជំនាញបានដកហូតវត្ថុតាង រួមមាន របាយសារធាតុញៀនកេតាមីន ចំនួន ជាង១តោន ៨២៧ គីឡូក្រាម សារធាតុគីមី និងគីមីផ្សំចំនួន ជាង ២៧៦តោន ឧបករណ៍ សម្ភារ: គ្រឿងបន្លាស់សម្រាប់កែច្នៃ ផលិតគ្រឿងញៀនមួយចំនួនធំ កេតាមីន ទម្ងន់សុទ្ធ២១៨.៦២ក្រាម រថយន្ត ០៨គ្រឿង ម៉ូតូ ០៣គ្រឿង ទូរស័ព្ទដៃ ១៩គ្រឿង អចលនទ្រព្យ ចំនួន ០៧កន្លែង មានដូចជាខុនដូរ០២ ឃ្លាំង០៤ រោងចក្រផលិត០១ និងផ្ទះវីឡា០១។

 បច្ចុប្បន្ន ជនសង្ស័យត្រូវបានបញ្ជូនខ្លួនដល់អយ្យការអមសាលាដំបូងរាជធានីភ្នំពេញ នឹងកំពុងស្ថិតក្នុងដំណាក់កាលតំណាងអយ្យការបើកការស៊ើបសួរ ៕​អត្ថបទ ៖ កុម្ភះ