ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ផ្សព្វផ្សាយច្បាប់ស្តីពីភាពជាដៃគូរវាងរដ្ឋ និងឯកជន (PPP) ដែលជាសមិទ្ធផលដ៏សំខាន់មួយទៀតរបស់រាជរដ្ឋាភិបាល ដើម្បីលើកកម្ពស់ការគ្រប់គ្រងយន្តការ PPP ក្នុងការរៀបចំ និងអនុវត្តគម្រោងហេដ្ឋារចនាសម្ព័ន្ធសាធារណៈ និងគម្រោងសេវាសាធារណៈ ដើម្បីជាឧត្តមប្រយោជន៍ដល់ការអភិវឌ្ឍសេដ្ឋកិច្ច និងសង្គមកម្ពុជា។

ឯកឧត្តមបណ្ឌិត ផាន់ ផល្លា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងសិក្ខាសាលាផ្សព្វផ្សាយ ស្តីអំពី “ច្បាប់ស្តីពីភាពជាដៃគូរវាងរដ្ឋ និងឯកជន -PPP” នៅថ្ងៃទី១២ ខែ កក្កដា ឆ្នាំ ២០២២ នេះថា ច្បាប់ PPP នេះត្រូវតាក់តែង និងកែសម្រួលអស់រយៈពេលជាច្រើនឆ្នាំ ដោយច្បាប់នេះ មានគោលបំណងលើកកម្ពស់ការគ្រប់គ្រងយន្តការ PPP ក្នុងការរៀបចំ និងអនុវត្តគម្រោងហេដ្ឋារចនាសម្ព័ន្ធសាធារណៈ និងគម្រោងសេវាសាធារណៈ ប្រកបដោយប្រសិទ្ធភាព ស័កិ្តសិទ្ធិភាព ចីរភាព តម្លាភាព គណនេ យ្យភាព និងយុត្តិធម៌ ដើម្បីជាឧត្តមប្រយោជន៍ដល់ការអភិវឌ្ឍសេដ្ឋកិច្ច និងសង្គមកម្ពុជា។

ឯកឧត្តម ផាន់ ផល្លា លើកឡើងបន្តថា ច្បាប់ PPP នឹងបង្កើតក្របខ័ណ្ឌគតិយុត្ត សម្រាប់គ្រប់គ្រងលើការរៀបចំអភិវឌ្ឍ និងអនុវត្តគម្រោង PPP នៅកម្ពុជា ប្រកបដោយភាពច្បាស់លាស់ និងស្របតាមអនុវត្តមានុវត្តន៍អន្តរជាតិ តាមរយៈការបែងចែកតួនាទី និងភារកិច្ចរវាងស្ថាប័នសាមី ដែលជាស្ថាប័នដឹកមុខតាមវិស័យ ក្នុងការរៀបចំអភិវឌ្ឍ និងអនុវត្តគម្រោង។ ក្រសួងសេដ្ឋកិច្ច និងហិរញ្ញវត្ថុ និងក្រសួង-ស្ថាប័នពាក់ព័ន្ធ នៃរបស់រាជរដ្ឋាភិបាល នៅតាមដំណាក់កាលនៃវដ្តគម្រោង ដូចមានចែងក្នុងច្បាប់នេះ និងនីតិវិធី SOP ដែលនឹងអាចនឹងត្រូវបានរាជរដ្ឋាភិបាល ពិនិត្យសម្រេច អនុម័តដាក់ឱ្យប្រើ ក្រោមអនុក្រឹត្យនាពេលខាងមុខនេះ។

សូមបញ្ជាក់ថា៖ ច្បាប់ស្តីពីភាពជាដៃគូរវាងរដ្ឋ និងឯកជន (PPP) នេះត្រូវតាក់តែង និងកែសម្រួលអស់រយៈ ពេលជាច្រើនឆ្នាំចាប់តាំងពីឆ្នាំ២០១៧ ហើយត្រូវបានគណៈរដ្ឋមន្រ្តីសម្រេចយល់ព្រមក្នុងសម័យប្រជុំ ពេញអង្គគណៈរដ្ឋមន្រ្តី, ទទួលបានការអនុម័ត ពីស្ថាប័ននីតិបញ្ញត្តិលើទម្រង់ និងគតិច្បាប់នេះទាំងស្រុង និងត្រូវបានព្រះមហាក្សត្រ ទ្រង់ឡាយព្រះហស្ដលេខាដាក់ឱ្យប្រើកាលពីថ្ងៃទី១៨ ខែវិច្ឆិកា ឆ្នាំ២០២១ កន្លងមក៕ អត្ថបទ៖ សុន រ៉ាឌី