ភ្នំពេញ៖នៅរសៀល ថ្ងៃទី១៣ ខែកក្កដា ឆ្នាំ២០២២ នៅទីស្នាក់ការកណ្ដាលធានាគារABA ឯកឧត្ដម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងលោក Askhat Azhikhanov នាយកប្រតិបត្តិធនាគារ ABA បានចុះអនុស្សរណ:នៃការយោគយល់គ្នារវាធនាគារABA និងគម្រោងសម្តេចតេជោសម្រាប់សកម្មភាពមីន "ផ្តល់ដីសុវត្ថិភាព បង្កើត​ស្នាមញញឹម " ស្តីពីការចូលរួមវិភាគទាននូវថវិកាចំនួន ២០ម៉ឺន ដុល្លារអាមេរិក ដើម្បីដោះស្រាយបញ្ហាគ្រាប់មីននៅកម្ពុជា។

ក្នុងនាមសម្តេចអគ្គមហាសេនាបតីតេជោ ហ៊ុន  សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីន ឯកឧត្ដម ទេសរដ្ឋមន្រ្តី  បានកោតសរសើរ និងថ្លែងអំណរគុណចំពោះទឹកចិត្តប្រកបដោយសប្បុរសរបស់ថ្នាក់ដឹកនាំ និងបុគ្គលិក នៃធនាគារ ABA ដែលបានចូលរួមដោះស្រាយក្នុងការផ្តល់ដីមានសុវត្ថិភាពជួយសង្រ្គោះអាយុជីវិតមនុស្ស  និងផ្តល់ស្នាមញញឹមដល់ប្រជាពលរដ្ឋកំពុងរស់នៅតំបន់រងផលប៉ះពាល់ដោយសារគ្រាប់មីន និងយុទ្ធភ័ណ្ឌមិនទាន់ផ្ទុះ។ ក្រៅពីនេះ ឯកឧត្តមបន្តអំពាវនាវដល់សប្បុរជននានា ចូលរួមបរិច្ចាកថវិកាតិចក្តីច្រើនក្តី ដើម្បីសម្អាតមីនឲ្យអស់នៅប្រទេសកម្ពុជា។

នៅថ្ងៃទី០៣ ខែកក្កដា ឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានអាជ្ញាធរមីន បានសម្រេចបង្កើត «គម្រោងសម្តេចតេជោសម្រាប់សកម្មភាពមីន - Samdech Techo Project for Mine Action_STP - MA» ក្រោមមូលបទ «ផ្តល់ដីសុវត្ថិភាព បង្កើតស្នាមញញឹម - Providing Safe Ground, Creating Smiles» ក្រោមការដឹកនាំ គ្រប់គ្រង និងសម្របសម្រួលដោយអាជ្ញាធរមីន ដែលមានសម្តេចតេជោ ជាប្រធាន។ បន្ទាប់ពីបង្កើតគម្រោងនេះ សប្បុរជននានា បានចូលរួមបរិច្ចាគថវិកាជាបន្តបន្ទាប់ ជូនដល់រាជរដ្ឋាភិបាលកម្ពុជា ដើម្បីដោះស្រាយបញ្ហាមីន នៅទូទាំងប្រទេសកម្ពុជា។

បើតាមរបាយការណ៍ពីអាជ្ញាធរមីន បានបង្ហាញថា គិតចាប់ពីឆ្នាំ១៩៩២ ដល់ឆ្នាំ២០២១ ពោលក្នុងរយៈពេល ២៩ឆ្នាំកន្លងមកនេះ ផ្ទៃដីទំហំជាង២ពាន់គីឡូម៉ែត្រក្រឡា ត្រូវបានបោសសម្អាតអស់មីន សម្រាប់យកទៅប្រើប្រាស់ និងបង្កបង្កើនផល ដោយប្រជាពលរដ្ឋទទួលផលមានជាង ៧លាននាក់ ហើយបច្ចប្បន្នផ្ទៃដីមិនទាន់បានបោសសម្អាតមីនអោយអស់ នៅសល់ជិត ២ពាន់គីឡូម៉ែក្រឡា៕