ស្ទឹងត្រែង៖ សប្បុរសជនក្នុងខេត្តស្ទឹងត្រែង បានបន្តនាំគ្នាយកថវិកាតាមសេចក្តីជ្រះថ្លារបស់ខ្លួន ចូលរួមបរិច្ចាគ ជូនដល់គណៈកម្មាធិការសាខាកាកបាទក្រហមកម្ពុជាខេត្ត ដើម្បីបម្រើដល់ការងារសប្បុរសធម៌ ជួយដល់ ជនរងគ្រោះ និងងាយរងគ្រោះ ។

ក្នុងកម្មវិធីទទួលអំណោយមនុស្សធម៌ នៅថ្ងៃទី១៣ ខែកក្កដា នេះ ឯកឧត្តម ស្វាយ សំអ៊ាង ប្រធានគណៈកម្មាធិការសាខាកាកបាទក្រហមកម្ពុជាខេត្តស្ទឹងត្រែង បានលើកឡើងថា ថវិកាដែលគណៈកម្មាធិការសាខាកាកបាទក្រហមកម្ពុជាខេត្តទទួលបាននាពេលនេះ នឹងត្រូវយកទៅប្រើប្រាស់ក្នុងការងារមនុស្សធម៌ជួយជនងាយរងគ្រោះ ជនក្រីក្រគ្មានទីពឹង ក្មេងកំព្រា ស្ត្រីមេម៉ាយ ចាស់ជរា និងអ្នកខ្វះខាត។ មិនតែប៉ុណ្ណោះ ថវិកាទាំងអស់នេះ សាខាកាកបាទក្រហមកម្ពុជាខេត្ត ក៏នឹងយកទៅជួយលើផ្នែកសុខភាពប្រជាពលរដ្ឋ។ ជាក់ស្តែងកន្លងមក សាខាកាកបាទក្រហមកម្ពុជាខេត្ត បានជួយដល់ប្រជាពលរដ្ឋខ្វះខាត ដែលបានមកព្យាបាលជំងឺនៅតាមមន្ទីរពេទ្យផងដែរ។

ឯកឧត្តម បានបញ្ជាក់ថា ការចូលរួមជាថវិកាជាមួយសាខាកាកបាទក្រហមកម្ពុជានាពេលនេះបង្ហាញពីទឹកចិត្តដ៏ប្បុរសធម៌ចំពោះប្រជាពលរដ្ឋរងគ្រោះ និងងាយរងគ្រោះបំផុត។

ឯកឧត្តម បានសន្យានឹងប្រើប្រាស់នូវថវិកាទាំងនេះ ឱ្យចំគោលដៅមនុស្សធម៌ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះរបស់ចលនាអន្តរជាតិកាកបាទក្រហម អឌ្ឍចន្ទក្រហម៕ អត្ថបទ៖ មាស ផល្លា