ភ្នំពេញ ៖ អនុគណៈកម្មការស្រាវជ្រាវជំងឺកូវីដ-១៩ នៃក្រសួងសុខាភិបាល នៅថ្ងៃទី៣០ ខែមីនា ឆ្នាំ២០២១នេះ បានជូនដំណឹងលើបណ្តាញសង្គម Facebook ឲ្យដឹងថា មានអ្នកកើតជំងឺកូវីដ-១៩ ធ្លាប់បានចូលទៅធនាគារ Sacombank Cambodia និងឱសថស្ថាន ឆាតវិមាន សូមអញ្ជើញទៅធ្វើតេស្តកូវីដ-១៩ជាប្រញាប់។

អនុគណៈកម្មការស្រាវជ្រាវជំងឺកូវីដ-១៩ បានអំពាវនាវឲ្យអ្នកពាក់ព័ន្ធអញ្ជើញទៅធ្វើតេស្ត និងពិនិត្យយកសំណាកទៅតាមលក្ខខណ្ឌ និងទីតាំងដូចក្នុងសេចកី្តជូនដំណឹងខាងក្រោមនេះ ៖ សេចកី្តជូនដំណឹង ករណីវីរុសកូវីដ-១៩ បានចូលក្នុងធនាគារ Sacombank Cambodia សាខានៅទីតាំងផ្ទះលេខ២៧៤, វិថីព្រះសីហនុ សង្កាត់វាលវង់ ខណ្ឌ ៧មករា រាជធានីភ្នំពេញ ចាប់ពីថ្ងៃទី១០ ដល់ថ្ងៃទី ២៤ ខែមីនា ឆ្នាំ២០២១( មូលហេតុ៖ អ្នកវិជ្ជមានកូវីដ១៩ ជាបុគ្គលិកផ្នែកអនាម័យនៅទីនោះ) និងឱសថស្ថាន ឆាតវិមាន ស្ថិតនៅផ្ទះលេខ ៣៩៣Eo ក្រុម១២ មហាវិថីម៉ៅសេទុង សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ ចាប់ពីថ្ងៃទី២៤ និង២៥ ខែមីនា ឆ្នាំ២០២១ (មូលហេតុ៖ អ្នកវិជ្ជមានកូវីដ១៩ បានទៅទីតាំងខាងលើ)។ ប្រសិនបើបងប្អូនដែលមានរោគសញ្ញាដូចជាគ្រុនក្តៅ ក្អក កណ្តាស់ ឈឺបំពង់ករ ដកដង្ហើមខ្លីៗ ឬសង្ស័យ និងធ្លាប់ចេញ-ចូល នៅទីតាំងចំនួន០២ខាងលើនេះ សូមអញ្ជើញទៅធ្វើតេស្តនៅមនី្ទរពេទ្យដែលបានកំណត់អនុញ្ញាត នៅក្នុងរាជធានីភ្នំពេញ និងខេត្តរបស់អ្នក(វិទ្យាល័យបាក់ទូក វិទ្យាល័យបឹងត្របែក សាលាបឋមសិក្សាសុភមង្គល (ក្រោយផ្សារស៊ិន ជូរី បណ្តោះអាសន្ន) មណ្ឌលសុខភាពចាក់អង្រែក្រោម ឬមនី្ទរពេទ្យមិត្តភាពខ្មែរ-សូវៀត និងមនី្ទរពេទ្យបង្អែកនៅតាមបណ្តាខេត្តនានា ចាប់ពីម៉ោង ៨៖៣០ ដល់១២៖០០ និង ១៤៖០០ ដល់ ១៧៖០០ ដោយឥតគិតថ្លៃ។ ព័ត៌មានបន្ថែមសូមទាក់ទងលេខ១១៥។ ចំពោះបុគ្គលដែលមិនមានរោគសញ្ញាសូមធ្វើចត្តាឡីស័កនៅផ្ទះ និងតាមដានសុខភាពរបស់អ្នករាល់ថ្ងៃរយៈពេល១៤ថ្ងៃ រាប់ពីថ្ងៃអ្នកបានប៉ះពាល់ចុងក្រោយ ឬទៅទីកន្លែងនោះ។ ហើយបុគ្គលទាំងអស់ ដែលបានធ្វើតេស្ដកូវីដ១៩ ត្រូវធ្វើចត្តាឡីស័ក១៤ថ្ងៃពេញ និងត្រឹមត្រូវ បើទោះជាលទ្ធផល ធ្វើតេស្ដលើកទី១ អវិជ្ជមាន ក៏ដោយ៕អត្ថបទ ៖ រដ្ឋា