រុស្ស៊ី៖ ទីភ្នាក់ងារសារព័ត៌មានរដ្ឋ TASS របស់រុស្ស៊ីបានរាយការណ៍កាលពីថ្ងៃពុធថា កងកម្លាំងរុស្ស៊ី និងទាហានតំណាងបានចូលដល់ទីក្រុង Siversk ក្នុងតំបន់ Donetsk របស់អ៊ុយក្រែន។ សារព័ត៌មាន Reuters មិនអាចផ្ទៀងផ្ទាត់របាយការណ៍នោះដោយឯករាជ្យបានទេ។
កងកម្លាំងប្រដាប់អាវុធរបស់អ៊ុយក្រែនបាននិយាយនៅក្នុងរបាយការណ៍ពេលល្ងាចថា រុស្ស៊ីមិនបានបើកការវាយប្រហារថ្មីៗទៅលើសមរភូមិជួរមុខទេ ដែលរួមទាំងទីក្រុង Siversk នោះផង ប៉ុន្តែទីក្រុងនេះត្រូវបានរងការបាញ់ផ្លោងដោយកាំភ្លើងធំ។ សារព័ត៌មាន TASS បានដកស្រង់សម្ដីមន្ត្រីមួយរូបនៅក្នុងសាធារណរដ្ឋប្រជាមានិតស្វ័យប្រកាស Lugansk មួយក្នុងចំណោមអង្គភាពផ្ដាច់ខ្លួនចំនួន២ គាំទ្រដោយរុស្ស៊ីនៅក្នុងប្រទេសអ៊ុយក្រែនភាគខាងកើត ជាទីដែលការវាយប្រយុទ្ធគ្នាដ៏ខ្លាំងក្លាក្នុងសង្គ្រាមរយៈពេល ២០សប្ដាហ៍កំពុងកើតមាន។
មន្ត្រីឈ្មោះ Vitaly Kiselyov ត្រូវបានដកស្រង់សម្ដីបាននិយាយថា ទីក្រុងនេះអាចធ្លាក់ចូលក្នុងដៃរបស់ពួកគេក្នុងពេល ២ថ្ងៃទៀត ប៉ុន្តែគេមិនច្បាស់ទេថា តើការអះអាងនោះសំអាងលើអ្វីនោះទេ។ កងកម្លាំងរុស្ស៊ី និងតំណាងនៅក្នុងប្រទេសអ៊ុយក្រែនភាគខាងកើតបានតស៊ូរយៈពេលជាច្រើនសប្ដាហ៍ មុនដណ្ដើមកាន់កាប់គោលដៅដូចជាទីក្រុង Sievierodonetsk និង Lysychansk៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
