ភ្នំពេញ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាលនៃបេឡាជាតិសន្តិសុខសង្គម មានប្រសាសន៍ថា ការអនុវត្តនូវរបបប្រាក់សោធនសម្រាប់កម្មករនិយោជិតនៃវិស័យឯកជន ជាបានឆ្លើយតប ទៅនឹងអ្វីដែលរដ្ឋាភិបាលបានដាក់ចេញ និងក្នុងការអភិវឌ្ឍរបបសន្តិសុខសង្គមផងដែរ។

នៅចំពោះមុខថ្នាក់ដឹកនាំសហជីព និងក៏ជាកិច្ចប្រជុំលើកទី២ នៃយុទ្ធនាការ៩០ថ្ងៃ ដើម្បីធ្វើការ​ផ្សព្វផ្សាយពីគោលនយោបាយរបស់រាជរដ្ឋាភិបាល ក៏ដូចជា​អត្ថប្រយោជន៍ ​និងកាតព្វកិច្ច ដែល​កម្មករនិយោជិត និងនិយោជក ត្រូវមានកាតព្វកិច្ច​ និងទទួលបានពីការអនុវត្តរបបផ្នែកប្រាក់សោធន កាលពីរសៀលថ្ងៃទី១៣​ កក្កដា ឆ្នាំ២០២២កន្លងទៅនេះ ​ឯកឧត្តមរដ្ឋមន្រ្តី អ៊ិត សំហេង បានលើក​ឡើងថា របបប្រាក់​សោធន​សម្រាប់វិស័យឯកជន ​គឺបានកំណត់យ៉ាងច្បាស់​ក្នុងអនុសាសន៍ទី៧ ក្នុងចំណោមអនុសាសន៍ទាំង១០ចំណុច ​របស់សម្តេចនាយករដ្ឋមន្រ្តីតេជោ ហ៊ុន សែន នាអំឡុង​ពេលចុះជួបសំណេះសំណាល​ជាមួយកម្មករនិយោជិតរយៈពេល ២ឆ្នាំ កាលពីឆ្នាំ២០១៧ ដល់ឆ្នាំ២០១៩កន្លងទៅ។

ក្នុងន័យនេះ ការអនុវត្តនូវរបបថ្មីនេះ ជាការទន្ទឹងរង់ចាំរបស់កម្មករនិយោជិត​ និងនិយោជក នៃ​បណ្តារោងចក្រ សហគ្រាស គ្រឹះស្ថាន ដែលស្ថិតនៅក្រោមបទប្បញ្ញត្តិនៃច្បាប់ ស្តីពីការងារ។

រាជរដ្ឋាភិបាលកម្ពុជា បានដាក់ចេញនូវច្បាប់ស្តីពីរបបសន្តិសុខសង្គម ដែលនៅក្នុងច្បាប់នេះ បានកំណត់ការគ្រប់គ្រងរបបសន្តិសុខសង្គមនៃព្រះរាជាណាចក្រកម្ពុជា។

ការដាក់ឱ្យអនុវត្តរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយដែលស្ថិតនៅ​ក្រោម​បទប្បញ្ញត្តិនៃច្បាប់ស្តីពីការងារ ​ជាចំណែកមួយក្នុងការអភិវឌ្ឍប្រព័ន្ធគាំពារសង្គមមួយដ៏រឹងមាំ ប្រកបដោយចីរភាព ​និងបរិយាបន្ន ដើម្បីជាប្រយោជន៍សម្រាប់ប្រជាជនគ្រប់ក្រុមគោលដៅ និង​ជាពិសេ​សបង្ការហានិភ័យខ្ពស់នៃការធ្លាក់ចូលក្នុងភាពក្រីក្រនៅពេលចូលដល់វ័យចាស់ជរា៕

អត្ថបទ៖ឈិត បូរ៉ាវី