​សហរដ្ឋអាមេរិក៖ រដ្ឋមន្ត្រីការបរទេស​សហរដ្ឋអាមេរិកលោក Antony Blinken និយាយថា ​រុស្ស៊ី​បាន​និរទេស​ដោយ​បង្ខំប្រជាជន​អ៊ុយ​ក្រែ​ន​រហូតដល់ ​1.6លាន​នាក់​ពី​តំបន់​ជាច្រើន​របស់​ប្រទេស​ដែល​គ្រប់គ្រង​ដោយ​រុស្ស៊ី​។​ លោក blinken បាន​ចេញ​សេចក្តីថ្លែងការណ៍​កាលពី​ថ្ងៃ​ពុធ ​ដោយ​ថ្កោលទោស​ការ​និរទេស​ពលរដ្ឋ​អ៊ុយ​ក្រែ​ន​ក្នុង​ចំនួន​ច្រើន​ទៅកាន់​ប្រទេស​រុស្ស៊ី​។

ប្រជាជន​ចន្លោះ​ពី ​900,000នាក់​ទៅ ​1.6​លាន​នាក់​ត្រូវបាន​ឲ្យ​ជម្លៀស​ខ្លួន​ដោយ​បង្ខំ រួមមាន​ទាំង​កុមារ ​260,000នាក់​។ សេចក្ដីថ្លែងការណ៍​បាន​និយាយ​ថា អាជ្ញាធរ​រុស្ស៊ី​តាម​សេចក្ដីរាយការណ៍​កំពុង​ប្រមូល​ទិន្នន័យ​ផ្ទាល់ខ្លួន​របស់​ប្រជាជន និង​បង្ខំ​ពួកគេ​ឲ្យ​ចុះហត្ថលេខា​ព្រមព្រៀង​ដើម្បី​រស់​នៅ​ក្នុង​ប្រទេស​រុស្ស៊ី ដោយ​រារាំង​ការ​វិល​ត្រលប់​មកកាន់​លំនៅឋាន​វិញ​។​ សេចក្ដីថ្លែងការណ៍​និយាយ​ផង​ដែរ​ថា អាជ្ញាធរ​កំពុង​ដកហូត​យក​លិខិតឆ្លងដែន​អ៊ុយ​ក្រែ​ន និង​ចេញ​ជំនួស​ដោយ​​លិខិតឆ្លងដែន​រុស្ស៊ីក្នុង​កិច្ចប្រឹងប្រែង​ភ្លាមៗ​ ដើម្បី​ផ្លាស់ប្ដូរ​ប្រជាជន​នៅ​តំបន់​ជាច្រើន​របស់​អ៊ុយ​ក្រែ​ន​។ ​លោក Blinken និយាយ​ថា ការផ្ទេរ​ និង​និរទេស​ដោយ​ខុសច្បាប់​ជន​ស៊ីវិល​បំពាន​លើ​អនុសញ្ញា​ទីក្រុង​ហ្សឺ​ណែវ និង​ជា​ឧក្រិដ្ឋកម្ម​សង្គ្រាម​។ សហរដ្ឋអាមេរិក និង​ធ្វើការ​ជាមួយ​សហគមន៍​អន្តរជាតិ ​ដើម្បី​នាំ​យក​រដ្ឋាភិបាល​រុស្ស៊ី​ឲ្យ​ទទួលខុសត្រូវ​សម្រាប់​ទង្វើរ​របស់​ខ្លួន៕

អត្ថបទ៖ ប៊ុនថន