ភ្នំពេញ៖ សារមន្ទីរជាតិកម្ពុជា មានការរៀបចំពិធីអបអរការបញ្ជូនសម្បត្តិវប្បធម៌ខ្មែរចំនួន ២៧រូប ដែលត្រូវបានលួចនាំចេញដោយខុសច្បាប់ នារសៀលថ្ងៃទី១៣ ខែកក្កដា ឆ្នាំ២០២២។

ក្នុងឱកាសនោះ ឯកឧត្តម Daniel J, Kritenbrink ឧបការីរដ្ឋមន្រ្តីក្រសួងការបរទេស សហរដ្ឋអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក បានថ្លែងសង្កត់ធ្ងន់ពីអនុស្សារណយោគយល់គ្នារវាង​រាជ​រដ្ឋាភិបាលកម្ពុជា ​និងសហរដ្ឋអាមេរិក ដែលបានពង្រឹងកិច្ចសហប្រតិបត្តិការផ្នែកវប្បធម៌​រវាង​ប្រទេសទាំងពីរ និងកោតសរសើរដល់កិច្ចខិតខំរួមគ្នារបស់ក្រសួងយុត្តិធម៌សហរដ្ឋអាមេរិក ផ្នែក​អនុវត្តច្បាប់ មេធាវីប្រចាំតំបន់ Manhattan ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រ​កម្ពុជា ​និងស្ថានទូតអាមេរិក ដែលបាននាំដល់ការធ្វើមាតុភូមិនិវត្តន៍នៃវត្ថុបុរាណចំនួន២៧រូបនេះ។

ទន្ទឹមនឹងនោះឯកឧត្តម Patrick Murphy ឯកអគ្គរដ្ឋទូត បានប្រកាសពីអំណោយថវិកាថ្មីមួយ​ទៀត​របស់រដ្ឋាភិបាលសហរដ្ឋអាមេរិក ​តាមរយៈមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ សម្រាប់​គម្រោងជួសជុលប្រាសាទព្រះវិហារ។

ឯកឧត្តម បានមានប្រសាសន៍ថា សហរដ្ឋអាមេរិក មាន​មោទនភាពចំពោះការរួមចំណែករបស់ខ្លួន​ដល់ការខិតខំក្នុងការអភិរក្សបេតិកភណ្ឌវប្បធម៌របស់ប្រទេសកម្ពុជា ​និងការខិតខំរួមគ្នារបស់យើង ក្នុងការបញ្ជូន​ត្រឡប់មកប្រទេសកម្ពុជាវិញ នូវវត្ថុបុរាណដែល​មិនអាចកាត់ថ្លៃបាន​ពី​សហរដ្ឋអាមេរិក។

នៅក្នុងពិធីខាងលើនេះ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និង​វិចិត្រសិល្បៈ ពិតជាមានកិត្តិយសចំពោះវត្តមានរបស់ឯកឧត្តម Daniel J, Kritenbrink ដែលបាន​ចំណាយ​ពេលវេលាដ៏មានតម្លៃចូលរួមជាមួយនឹងយើងនៅថ្ងៃនេះ ដើម្បីស្វាគមន៍នៃការប្រគល់​ត្រឡប់​មកកម្ពុជា​វិញ នូវសម្បត្តវប្បធម៌ខ្មែរចំនួន ២៧រូប។

លោកជំទាវ បណ្ឌិតសភាចារ្យ សូមថ្លែងអំណរគុណដោយស្មោះចំពោះការរួមចំណែក​របស់​រដ្ឋាភិបាល​សហរដ្ឋ​អាមេរិក ទាំង​ពេលវេលា ​និងធនធាន​ ក្នុងការប្រយុទ្ធប្រឆាំង​នឹងការជួញដូរ​ដោយ​ខុស​ច្បាប់នូវសម្បត្តិវប្បធម៌ ​និងការអភិរក្សសម្បត្តិបេតិកភណ្ឌវប្បធម៌ ​តាមរយៈជំនួយពីមូល​និធិ​ឯកអគ្គរដ្ឋទូតសម្រាប់ការអភិរក្សវប្បធម៌​ ជាពិសេសលោកជំទាវ ពិតជាមាន​សេចក្តី​សោមនស្ស​រីករាយ​ដែល​ទទួល​បាន​ជំនួយ​បន្ថែមទៀត​សម្រាប់គម្រោងជួសជុលប្រាសាទព្រះវិហារ៕ អត្ថបទ រដ្ឋា