កំពង់ចាម៖ ស្ថានភាពអាកាសធាតុក្នុងខេត្តកំពង់ចាម-ត្បូងឃ្មុំ មួយរយៈចុងក្រោយនេះ មានធ្លាក់ភ្លៀងតាមតំបន់ បណ្ដាលឱ្យទឹកទន្លេមេគង្គ បានហក់ឡើងជាបន្ទបន្ទាប់ ប៉ុន្តែមិនទាន់ដល់កម្រិតប្រកាសអាសន្ននៅឡើយទេ។

យោងតាមរបាយការណ៍កម្ពស់ទឹក របស់មន្ទីរធនធានទឹក និងឧត្តុនិយម ខេត្តកំពង់ចាម បានបញ្ជាក់ថា នៅថ្ងៃទី១៣ ខែកក្កដានេះ ទឹកទន្លេមេគង្គ បានឡើងសន្សឹមៗដល់កម្ពស់៨.៥៦ម៉ែត្រ បើធៀប ឆ្នាំមុន កម្ពស់ទឹកទន្លេមេគង្គកំពង់ចាម ៥.០៧ម៉ែត្រកម្រិត ដែលត្រូវប្រកាសអាសន្ន​សម្រាប់ខេត្តកំពង់ចាម គឺកម្ពស់១៥ម៉ែត្រ២០សង់ទីម៉ែត្រ។ ហើយកម្ពស់ទឹកទន្លេឡើងនៅពេលនេះ មិនទាន់​បានហូរចូល ទៅតំបន់វាលទំនាបទេ ពោលគឺបច្ចុប្បន្ន តាមដងទន្លេតូច ​ក្នុងស្រុកកោះសូទិន ការធ្វើដំណើររបស់ប្រជាពលរដ្ឋនៅរដូវនេះ គឺប្រើប្រាស់ទូកចម្លងឬកាណូត ឆ្លងពីត្រើយម្ខាងទៅម្ខាង។

តែសម្រាប់ប្រជាពលរដ្ឋ ដែលរស់នៅតាមដងទន្លេមេគង្គ ក្នុងខេត្តកំពង់ចាម-ត្បូងឃ្មុំ បានសម្ដែង ការព្រួយបារម្ភថា បើទឹកទន្លេតូចដូចឆ្នាំទៅ ​គឺពួកគេនឹងជួបការលំបាកក្នុងការងារបង្កបង្កើនផល​ហើយ​ជា​ពិសេសធ្វើឲ្យដីរឹង ​ពិបាកភ្ជួររាស់ សម្បូរសត្វកណ្តុរ​ និងស្រមោច។

ប្រជាពលរដ្ឋ បានបញ្ជាក់ថា​ ក្រៅពីនោះ ទឹកតូចពេក ក៏នឹងមិនបាននាំមកនូវដីល្បាប់ ​សម្រាប់ការ ងារដាំដុះដំណាំផ្សេងៗ ប៉ុន្តែបើទឹកជំនន់ធំ​ និងអូសបន្លាយយូរពេក​ ក៏មិនល្អដែរ៕ អត្ថបទ៖ ថុង សីហា