ម៉ាល់ឌីវ៖ កាលពីថ្ងៃពុធប្រជាពលរដ្ឋម៉ាល់ឌីវបានភ្ញាក់ផ្អើល ចំពោះដំណឹងនៃការមកដល់គួរឲ្យភ្ញាក់ផ្អើលរបស់ប្រធានាធិបតីស្រីលង្កាដែលនាំឲ្យមានប្រតិកម្មខ្លាំង ខណៈដែលរដ្ឋាភិបាលប្រទេសកោះម៉ាល់ឌីវត្រូវបានចោទប្រកាន់ ពីបទជួយមេដឹកនាំដ៏អាម៉ាស់រូបនេះឲ្យគេចផុតពីសំណាញ់ច្បាប់។
លោក Rajapaksa វ័យ ៧៣ឆ្នាំរូបនេះបានរត់គេចខ្លួនទៅកាន់ប្រទេសប្រជុំកោះមហាសមុទ្រឥណ្ឌាជិតខាងរបស់ខ្លួន ប៉ុន្មានម៉ោងមុនការសន្យាលាលែងពីតំណែងរបស់លោក ជុំវិញវិបត្តិសេដ្ឋកិច្ចធ្ងន់ធ្ងរបំផុតមិនធ្លាប់មានក្នុងពេលជាច្រើនទសវត្សរ៍របស់ស្រីលង្កា។ កាលពីរសៀលថ្ងៃពុធ ក្រុមជនជាតិស្រីលង្ការស់នៅក្នុងប្រទេសម៉ាល់ឌីវ បានចេញតវ៉ានៅឆ្នេរសមុទ្រសិប្បនិមិត្តក្នុងរដ្ឋធានី Male ដោយកាន់បដាសរសេរថា ជូនចំពោះមិត្តជនជាតិម៉ាល់ឌីវ សូមជំរុញដល់រដ្ឋាភិបាលរបស់អ្នកកុំការពារឧក្រិដ្ឋជនរូបនេះឲ្យសោះ។ នគរបាលបង្ក្រាបកុបកម្មដកហូតបដា និងផ្ទាំងប្រកាសផ្សេងៗភ្លាមៗ និងបានបំបែកជួរក្រុមបាតុករទាំងនោះ។
ជាមួយគ្នានោះបុរសជនជាតិស្រីលង្កាម្នាក់ត្រូវបានឃុំខ្លួន។ នៅតាមបណ្ដាញសង្គម និងការបង្ហាញមតិយោបល់ ឬ comment នៅលើបណ្ដាញព័ត៌មាននានា ពលរដ្ឋម៉ាល់ឌីវបានបង្ហាញការខឹងសម្បារ និងការសាមគ្គីជាមួយក្រុមអ្នកតវ៉ាស្រីលង្កា ដោយអំពាវនាវឲ្យធ្វើមាតុភូមិនិវត្តន៍ខ្លួនលោក Rajapaksa និងថ្កោលទោសការសម្រេចចិត្តគួរឲ្យអាម៉ាស់ ក្នុងការសម្របសម្រួលការចាកចេញរបស់លោកពីប្រទេសស្រីលង្កា។ ក្ដីបារម្ភក៏បានលើកឡើងផងដែរ ជុំវិញសុវត្ថិភាពរបស់ជនជាតិម៉ាល់ឌីវប្រមាណ 8,000នាក់ដែលបានរស់នៅក្នុងប្រទេសស្រីលង្កា ស្របពេលភាពរំជើបរំជួលនៅតែបន្ត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
