ភ្នំពេញ៖ ក្រសួងមុខងារសាធារណៈ​កំពុងគិតគូរ ​និងធ្វើការងារជាមួយដៃគូរពាក់ព័ន្ធ ដើម្បី​បង្កើត​កាត​សម្គាល់​របស់​មន្ត្រីរាជការជំនាន់ថ្មី ដែលមានមុខងារជាកាតសម្គាល់អត្តសញ្ញាណរបស់​មន្ត្រី​រាជការផង ​និងអាចប្រើជាកាត ដែលអាចដកប្រាក់បៀវត្សរ៍ពីម៉ាស៊ីនATMបានផងដែរ។

ឯកឧត្តម ឆាយ ឆត្រាវុធ អនុរដ្ឋលេខាធិការក្រសួងមុខងារសាធារណៈ ក្នុងពេលអញ្ជើញ​ជា​អធិបតីភាព​ ក្នុងកិច្ចប្រជុំ ស្តីពី ”ការផ្តល់ធាតុចូលលើសេចក្តីព្រាងនីតិវិធី នៃការត្រួតពិនិត្យលើការ​ផ្លាស់ប្តូរ​ស្ថាន​ភាពរដ្ឋបាល ​និងគ្រួសារ របស់មន្ត្រីរាជការស៊ីវិលនៅថ្នាក់ក្រោមជាតិ” ដែលបានធ្វើនៅ​លាសាខេត្តពោធិ៍សាត់ កាលពីម្សិលមិញ​ បានបញ្ជាក់ថា​ កម្រិតជីវភាពរបស់មន្ត្រីរាជការ កំពុងត្រូវបាន​គិតគូរ​ពីរាជរដ្ឋាភិបាល។

ឯកឧត្តម បានបន្តលើកឡើងថា ​ក្រសួងមុខងារសាធារណៈ ​ដែលជាសេនាធិការរបស់រាជរដ្ឋាភិបាល បាននឹងកំពុងខិតខំធ្វើយ៉ាងណា ​ឲ្យដំណើរការនៃការដំឡើង និងបើក​ប្រាក់​បៀវត្សរ៍​ជូនមន្ត្រីរាជការ​កាន់​តែមានភាពល្អប្រសើរ ច្បាស់លាស់ត្រឹមត្រូវ និងមានភាពងាយស្រួលឆាប់រហ័ស ស្របតាម​បច្ចេកវិទ្យាជឿនលឿន។

ក្នុងកិច្ចប្រជុំនេះក៏មានការធ្វើបទបង្ហាញសំខាន់ៗ ពីមន្ត្រីជំនាញនៃក្រសួងមុខងារសាធារណៈផងដែរ ជូនដល់ មន្ត្រីរាជការដែលបានចូលរួមប្រមាណ៦០នាក់ មកពីគ្រប់អង្គភាពមន្ទីរជុំវិញខេត្ត ដែលធ្វើ​ឱ្យពួកគេទទួល​បាន​នូវចំណេះដឹងថ្មីៗ ​លើការប្រើប្រព័ន្ធបច្ចេកវិទ្យាព័ត៌មាន ក្នុងការគ្រប់គ្រង​ទិន្នន័យ​មន្ត្រីរាជការ និងមានការយល់ដឹងបន្ថែម លើច្បាប់និងនីតីវិធីផ្សេងៗ៕អត្ថបទ៖ ភិរុណ ពៅ