ហៃទី៖ ប្រជាជនហៃទីបានតវ៉ាកាលពីថ្ងៃពុធ ចំពោះតម្លៃប្រេងឥន្ធនៈឡើងថ្លៃខ្ពស់នៅទីក្រុងព័រអូប្រាំង ខណៈប្រទេសតំបន់សមុទ្រការ៉ាអ៊ីតមួយនេះបន្តធ្លាក់ចូលក្នុងការដួលរលំ ខណៈអំពើហិង្សាកើនឡើង ហើយសេដ្ឋកិច្ចធ្លាក់ចុះ។
ក្រុមបាតុករបានបិទផ្លូវដោយដុតសំបកកង់រថយន្ត និងបង្កើតរបាំងបិទផ្លូវជាច្រើនកន្លែង។ នគរបាលត្រូវបានបញ្ជូនទៅកាន់កន្លែងតវ៉ា និងបានបាញ់ឧស្ម័នបង្ហូរទឹកភ្នែកដើម្បីបំបែកក្រុមបាតុករ។ កង្វះប្រេងឥន្ធនៈ និងតម្លៃសាំងឡើងថ្លៃបានជំរុញឱ្យការដឹកជញ្ជូនសាធារណៈផ្សេងៗដំឡើងថ្លៃឈ្នួលរបស់ពួកគេ។ តម្លៃប្រេងសាំងមួយហ្គាឡុងមានតម្លៃប្រហែល ១៣ដុល្លារនៅក្នុងទីផ្សារងងឹតនៅក្នុងប្រទេសនេះ។
សេដ្ឋកិច្ចធ្លាក់ចុះគឺជាផ្នែកមួយនៃការដួលរលំប្រទេស ដែលបានជួបការលំបាកចាប់តាំងពីឆ្នាំមុនក្នុងការគ្រប់គ្រងការកើនឡើងអំពើហិង្សារបស់ក្រុមជនអន្ធពាល ដែលបានរាលដាលដល់ផ្នែកធំៗនៅរដ្ឋធានី។ អាជ្ញាធរសង្កាត់ Cite Soleil ទីក្រុងព័រអូប្រាំងបាននិយាយថា ការប្រយុទ្ធគ្នាបានផ្ទុះឡើងកាលពីថ្ងៃសុក្រសប្តាហ៍មុន ក្នុងការប៉ះទង្គិចគ្នារវាងសមាជិកក្រុមប្រជែង ២ក្រុមបណ្តាលឲ្យមនុស្សយ៉ាងហោចណាស់ ៥០នាក់ស្លាប់ និងជាង ៥០នាក់រងរបួស៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
