ភ្នំពេញ៖ ឯកឧត្តម នរៈ រតនវឌ្ឍនោ រដ្ឋលេខាធិការ តំណាងឯកឧត្តម ឈិត សុខុន រដ្ឋមន្ត្រី ក្រសួងធម្មការ និងសាសនា បានអៈអាងថា យុវជន ជាកម្លាំងចលករ ក្នុងការអភិវឌ្ឍន៍ប្រទេសជាតិ។

ការថ្លែងរបស់ឯកឧត្តម នរៈ រតនវឌ្ឍនោ រដ្ឋលេខាធិការ តំណាងឯកឧត្តម ឈិត សុខុន រដ្ឋមន្ត្រី ក្រសួងធម្មការ និងសាសនា​ យ៉ាងដូច្នេះក្នុងកម្មវិធីអប់រំទស្សនទានព្រះពុទ្ធសាសនា ដល់​សិស្សានុសិស្សវិទ្យាល័យ​សម្តេច ហ៊ុន សែន ប៊ុនរ៉ានី ច្បារអំពៅ​ ខណ្ឌច្បារអំពៅ ចំនួន៣៥០នាក់ នាព្រឹកថ្ងៃទី១៤ ខែកក្កដា ឆ្នាំ២០២២នេះ។

បន្ទាប់ពីលោកនាយកវិទ្យាល័យ សម្តេច ហ៊ុន សែន ប៊ុនរ៉ានី ច្បារអំពៅ​ មានប្រសាសន៍​ពីវឌ្ឍនភាព​នៃការ​អប់រំ​សិក្សារួចមក ឯកឧត្តម នរៈ រតនវឌ្ឍនោ បានពាំនាំនូវការសួរសុខទុក្ខប្រកបដោយ​សេចក្តីនឹករលឹក​យ៉ាង​ជ្រាល​ជ្រៅបំផុតពី​សម្តេច​អគ្គមហាសេនាបតីតេ​ជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលជានិច្ចជាកាលសម្តេចតែងតែយកចិត្ត​ទុកដាក់គិតគូជាទីបំផុតពី​សុ​ខទុក្ខ និងការរស់នៅ​របស់​យុវជន យុវតីក៏ដូចលោកគ្រូអ្នកគ្រូនៅទូទាំងប្រទេស។​

ឯកឧត្តម នរៈ រតនវឌ្ឍនោ បានកោតសរសើរចំពោះ ព្រះភិក្ខុវិមលោ ផល ចាន់ថេត ធម្មកថិកា​ចារ្យ​ដែលបានចំណាយពេលវេលាក្នុងការនិមន្តមកផ្តល់ឱវាទអប់រំទូន្មានដល់សិស្សានុសិស្សក្នុងវិទ្យាល័យ ខាងលើនាពេលនេះ ដើម្បីជាស្ពានមួយដ៏ល្អសម្រាប់សិស្សានុសិស្សទាំងអស់យកទៅអនុវត្តសម្រាប់វិថីជីវិត របស់ពួកគេ។ ការលើកយកប្រធានបទស្តីពី យុវជនជាសសរទ្រូងនៃសង្គមជាតិ ពិតជាមានអត្ថន័យ​យ៉ាង​ធំ​ធេង ​និងបានជាមាគ៌ាសម្រាប់ប្រតិបត្តិដើម្បីឆ្ពោះទៅកាន់ភាពជោគជ័យក្នុងថ្ងៃអនាគត។ កម្មវិធីនេះត្រូវបានបង្កើតឡើង​ក្រោមគំនិត​ផ្តួច​ផ្តើម​ដ៏ខ្ពង់​ខ្ពស់របស់សម្តេចអគ្គមហា​សេនា​បតីតេជោ ហ៊ុន សែន នាយក​រដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រៀបចំដឹកនាំ​ដោយក្រសួងធម្មការ និងសាសនា ដែលមាន​នាយកដ្ឋានស្រាវជ្រាវផ្សព្វផ្សាយពុទ្ធសាសនាផ្សារភ្ជាប់សង្គម ជាអ្នកប្រតិបត្តិដោយផ្ទាល់ និងមាន​ការ​សហការ​​ជាមួយ​ក្រសួង​អប់រំ យុវជន និងកីឡា និងអគ្គនាយកដ្ឋានវិទ្យុ ទូរទស្សន៍រដ្ឋ និងឯកជនធ្វើការផ្សព្វ​ផ្សាយក្នុងគោលបំណងរួមចំណែក អប់រំទូន្មាន បណ្តុះស្មារតីសិស្សឱ្យយល់ដឹងអំពីការប្រកាន់ខ្ជាប់ នូវអំពើល្អ សីលធម៌ សុជីវធម៌ គុណធម៌ក្នុងសង្គម យល់ដឹងពីតម្លៃគុណផលនៃការសិក្សា ចេះគោរពមាតា​បិតា ចាស់ព្រឹទ្ធាចារ្យត្រកូលរៀមច្បង បុព្វការីជនក្នុងគ្រួសារ និងសង្គម ចេះគោរពលោកគ្រូ អ្នកគ្រូ ចៀសផុត ពីការសេពគ្រឿងញៀន គ្រឿងស្រវឹង អំពើហិង្សាក្នុងគ្រួសារ។

ឯកឧត្តម នរៈ រតនវឌ្ឍនោ បានបញ្ជាក់ទៀតថា ពាក្យប្រៀនប្រដៅរបស់ព្រះពុទ្ធ បាន​រួមវិភាគទានយ៉ាងច្រើនចំពោះសង្គមរាល់គ្រប់វិស័យទាំងអស់ ជាឃ្លាំងសម្រាប់ផលិតធនធានមនុស្សឲ្យដើរនៅលើគន្លងផ្លូវនៃអហិ​ង្សា​ធម៌ ការយោគយល់ ការអត់ឱនឱ្យគ្នា និងជាមាគ៌ាសន្តិភាពសម្រាប់​មនុស្សជាតិក្នុង​សង្គមទាំងមូល។ តាមរយៈកម្មវិធីអប់រំទស្សនទានតាមបែបព្រះពុទ្ធសាសនានេះ នឹងបានរួមចំណែក​ជួយ​សិ​​ស្សា​​​នុសិស្សក្នុងវិទ្យាល័យសម្តេច ហ៊ុន សែន ប៊ុនរ៉ានី ច្បារអំពៅ ​ឲ្យយល់ពីទឹកចិត្តនៃការលះបង់​និង​គុណ​បំណាច់​ដ៏ធំធេងរបស់លោកឳពុក អ្នកម្តាយ ដែលបានចិញ្ចឹមបី​បា​ច់​ថែរក្សាយើងទាំងអស់គ្នាតាំង​ពីតូច​រហូត​ដល់​កូនធំដឹងក្តីមិនថាជួបប្រទះភាពលំបាកនឿយ​ហត់អស់កម្លាំង​យ៉ា​ង​​ណា ក៏លោកទាំងពីរតែង​តែ តស៊ូគ្រប់​បែបយ៉ាង​ដើម្បីកូនៗជាទីស្រលាញ់។ ជាង​នេះ​ទៅទៀតលោក​បានពលីគ្រប់​បែប​យ៉ាង​មិនដែលត្អូញត្អែរ មិន​ចេះ​ហត់ ហើយក៏មិនដែលគិតពីសុខភាព​របស់​ខ្លួនគឺធ្វើយ៉ាងណាចិញ្ចឹមបីបាច់ថែរក្សា​ឲ្យកូនបាន​សិក្សារៀន​សូត្រ​តាំងពីតូចរហូតដល់ធំដឹងក្តី ព្រមទាំងផ្គត់ផ្គង់ទាំង​សំភារៈ និងស្មារតីដែលទាំងអស់នេះកើតចេញពីកម្លាំង​ញើសឈាមរបស់អ្នកមានគុណដែលចង់ឲ្យកូនមានអនា​គតត្រចះត្រចង់៕​អត្ថបទ រដ្ឋា