កំពង់ស្ពឺ ៖ ឈាបនដ្ឋាន ដែលធ្វើឡើងសម្រាប់បូជាសពដែលស្លាប់ដោយសារជំងឺកូវីដ១៩នៅក្នុងខេត្តកំពង់ស្ពឺ​កំពុងដំណើររៀប​ចំយ៉ាង​លឿន​បំផុត ខណៈនេះបណ្ដាញអគ្គីសនីកំពុងតភ្ជាប់ រីឯឡដុតអគ្គីសនីក៏បានបញ្ជាទិញពីបរទេសរួចរាល់ហើយដែរ។

លោក ម៉េត មាសភក្ដី អ្នកនាំពាក្យតដ្ឋបាលរាជធានីភ្នំពេញបានឱ្យដឹងនៅព្រឹកថ្ងៃទី៣១ ខែមីនា ឆ្នាំ២០២១ថា ដោយសារនេះជាការងារអាទិភាព យើងកំពុងសម្រុករៀបចំ និងជម្រុញឱ្យបានរួចរាល់យ៉ាងលឿនបំផុត។ អ្នកនាំពាក្យបន្ថែមថា ពេលនេះ គឺបានរៀបចំប្លង់សាងសង់ រៀបចំទីតាំងរួចរាល់ និងបច្ចុប្បន្នកំពុងតបណ្តាញអគ្គិសនី។ រីឯសំភារៈបច្ចេកទេសគ្រឿងម៉ាស៊ីន (ឡដុត) បានបញ្ជាទិញពីបរទេសរួចរាល់ នឹងមកដល់ឆាប់ៗនេះហើយ។

លោក ម៉េត មាសភក្ដី បានបញ្ជាក់ថា បើទោះបីកិច្ចការនេះ ជាអ្វីដែលយើងបានគ្រោង និងរៀបចំទុកដើម្បីបង្កាហានិភ័យណាមួយកើតឡើង​ក៏ដោយ ក៏រហូតមកដល់ពេលនេះ ករណីអ្នកស្លាប់ដោយសារកូវីដ១៩ ក៏កើតមានជាបន្តបន្ទាប់រហូតដល់ជាង ១០នាក់ហើយ។ នេះក៏ជាសារក្រើនរំនឹកបន្ថែមទៀតដល់ប្រជាពលរដ្ឋគ្រប់រូប សូមមានការប្រុងប្រយ័ត្នខ្ពស់ ដោយអនុវត្តឱ្យបានខ្ជាប់ខ្ជួននូវវិធានទប់ស្កាត់ការចម្លង ការរីករាលដាលជំងឺកូវីដ១៩របស់ក្រសួងសុខាភិបាល ក៏ដូចជា ៣ការពារ ៣កុំរបស់សម្តេចតេជោនាយករដ្ឋមន្ត្រី។

សូមបញ្ជាក់ថា ឈាបនដ្ឋាននេះមានផ្ទៃដីប្រមាណ១០ហិកតា ស្ថិតនៅភូមិជាំ ឃុំតាសាល ស្រុកឱរ៉ាល់ ខេត្តកំពងស្ពឺ៕ អត្ថបទ ៖ ប្រាក់ វ៉ាន់ដា