​បាល់ទាត់៖ លោក Conor Nestor គ្រូ​បង្វឹក​ក្រុមព្រះ​ខ័ន​រាជ​ស្វាយរៀង បាន​ប្រាប់​អ្នកគាំទ្រ​ឲ្យ​មានការ​អត់ធ្មត់​សិន ចំពោះ​ការ​បង្ហាញ​ខ្លួន​បាន​តិច​របស់​ខ្សែប្រយុទ្ធ​ចំណូល​ថ្មី Robert Lopez Mendy ដ្បិត​រូបគេ​ត្រូវការ​ពេលវេលា​ច្រើន​ទៀត ដើម្បី​ចុះសម្រុង​ជាមួយ​ក្រុម។​

​ការ​លើក​ឡើង​នេះបន្ទាប់ពី​ឆ្លងកាត់ ២​ប្រកួត​កន្លងមក កីឡាករ Lopez Mendy ទើប​បង្ហាញខ្លួន​បាន ៥៥​នាទី​ប៉ុណ្ណោះក្នុងនោះ​ប្រកួត​ទី​១ គេ​លេង​បាន ២៥​នាទីពេល​ព្រះខ័ន​រាជ​ស្វាយរៀង យកឈ្នះ​ក្រុម​អគ្គិសនី​កម្ពុជា ៦-១ និង​ប្រកួត​ទី​២ លេង​បាន ៣០​នាទី ខណៈ​ក្រុម​ឈ្នះ​ណាហ្គា​វើ​ល​ដ៏ ៣-១ កាលពី​ចុង​សប្ដាហ៍​កន្លងទៅ ក្នុងនោះ Mendy ក៏​រកបាន ១​គ្រាប់​ចុង​ម៉ោង​ផងដែរ ។ ​លោក Conor Nestor បានទទួល​ស្គាល់​សមត្ថ​ភាព ​របស់​ខ្សែប្រយុទ្ធ​សញ្ជាតិ​សេ​ណេ​ហ្គា​ល់​រូបនេះ តែ​ដោយ​សារ Mendy ទើប​ចេញពី​ច​ត្ដា​ឡី​ស័ក ហើយ​ពុំបាន​លេង Pre-Season ជាមួយ​ក្រុម​ផង​នោះ ហេតុនេះ​គេ​ត្រូវការ​ពេលវេលា​មួយ​ចំនួន​ទៀត ដើម្បី​បង្កើត​ភាព​អស្ចារ្យ​ជាមួយ​ក្រុម​នា​ពេល​ខាង​មុខ ដែល​អ្នកគាំទ្រត្រូវ​អត់ធ្មត់ និង​រង់​ចាំ​មើល​ទាំង​អស់​គ្នា។​

​គួរ​ដឹង​ថា Mendy បាន​ផ្ទេរ​មកពី​ក្លិប​ជើងឯក​លី​គ​កំពូល​ហ្វីលីពីន United City FC ហើយ​ក្រោយ​​បញ្ចប់​ការ​ធ្វើ​ច​ត្ដា​ឡី​ស័ក ១​ថ្ងៃ ពោល​គឺ​នៅ​ថ្ងៃ​ទី​១៣ ខែ​មីនា លោក Conor​ ក៏បាន​ដាក់​ឲ្យ​គេ​លេង ២៥​នាទី​ចុង​ក្រោយ​ជាមួយ​ក្រុម​អគ្គិសនី​កម្ពុជា។ ឆ្លងកាត់ ២​ប្រកួត​កន្លងមក អ្នកគាំទ្រ​រំពឹង​ថា Mendy នឹង​ក្លាយ​ជា​អាវុធ​ដ៏​មុត​ស្រួច​ម្នាក់ទៀត​ របស់​ក្រុម​ជើងឯក​រង​ឆ្នាំ​ចាស់ បន្ថែម​លើ​កីឡាករ Privat ​និង Mika ដែល​ជា​ដៃគូ​ដ៏​ប៉ិនប្រសប់​នៅ​តំបន់​ប្រយុទ្ធ៕

​អត្ថបទ៖ លី ឈុន​ឡា