​ស្រីលង្កា៖ ទេសាភិបាល​ធនាគារ​កណ្ដាល​របស់​ប្រទេស​ស្រីលង្កា​លោក Nandalal Weerasinghe បាន​ព្រមាន​ថា ប្រទេស​នេះ​អាច​នឹង​បិទទ្វារ ប្រសិនបើ​ពុំ​មាន​រដ្ឋាភិបាល​ប្រកបដោយ​ស្ថិរភាព ​ត្រូវ​បាន​បង្កើត​ឡើង​ក្នុង​ពេល​ឆាប់ៗ​ទេ​នោះ​។

​លោក​បាន​ប្រាប់​កម្មវិធី Newsnight programme របស់​ទូរទស្សន៍ BBC ថា មាន​ភាពមិនច្បាស់លាស់​ច្រើនណាស់​ជុំវិញ​ថា​ តើ​ទុន​បម្រុង​បរទេស​អាច​គ្រប់គ្រាន់​ល្មម​ទូទាត់​ថ្លៃប្រេងឥន្ធនៈ​ដ៏​សំខាន់​បាន ​ឬ​អត់​។ ភាព​រីកចម្រើន​ទៅលើ​កញ្ចប់​ថវិកា​សង្គ្រោះ​អន្តរជាតិ​ពឹងផ្អែក​ទៅលើ​រដ្ឋបាល​មួយ​ដែល​មាន​ស្ថិរភាព។​ ប្រទេស​នេះ​កំពុង​ត្រូវ​ញាំញី​ដោយ​ភាព​រំជើបរំជួល​ដ៏​កក្រើកជុំវិញ​វិបត្តិ​សេដ្ឋកិច្ច​។ ប្រទេស​ស្រីលង្កា​បាន​មើល​ឃើញ​ការ​ដួល​រលំ​សេដ្ឋកិច្ច​ និង​ការ​ហក់​ឡើង​ខ្ពស់​កប់​ពពក​នៃ​តម្លៃ​ម្ហូបអាហារ ប្រេងឥន្ធនៈ និង​សម្ភារ​ផ្គត់ផ្គង់​មូលដ្ឋាន​សំខាន់ៗ​ផ្សេងទៀត ដែល​ប៉ះពាល់​យ៉ាង​ខ្លាំង​ដល់​ប្រជា​ពលរដ្ឋ​ទូទៅ។

​លោក Nandalal Weerasinghe ដែល​បាន​ឡើង​កាន់​តំណែង​ជា​ទេសាភិបាល​ធនាគារ​កណ្ដាល​កាលពី​ខែមេសា​បាន​និយាយ​ថា លោក​មើល​មិន​ឃើញ​ផ្លូវ​ដើរ​ទៅ​មុខ​តាមរបៀប​ណា​ក្នុង​ការ​ផ្ដល់​វត្ថុ​ចាំបាច់ បើ​ពុំ​មាន​រដ្ឋបាល​មួយ​ប្រកប​ដោយ​ស្ថិរភាព​នោះ​។​ ទេសាភិបាល​ធនាគារ​កណ្ដាល​រូប​នេះ​ត្រូវ​គេ​មើល​ឃើញ​រូបលោក ជា​បេក្ខជន​ប្រធានាធិបតី​ថ្មី​ដ៏​មាន​សក្ដានុពល ប៉ុន្តែ​ទំនងជា​បាន​ច្រានចោល​វិញ​ដោយ​និយាយ​ថា ខ្ញុំ​មិន​ចាប់អារម្មណ៍​តំណែង​ជា​អ្នកនយោបាយ​ទេ​៕

អត្ថបទ៖ សុខមាន