​ស្រីលង្កា៖ ការ​អបអរ​បាន​ចាប់ផ្តើម​នៅ​ក្នុង​ប្រទេស​ស្រីលង្កា​កាលពី​យប់​ថ្ងៃ​ព្រហស្បតិ៍ បន្ទាប់ពី​ជំនួយការ​ប្រធាន​សភា​របស់​ប្រទេស​នេះ​ប្រកាស​ថា​ ប្រធានាធិបតី​លោក Gotabaya Rajapaksa បាន​លាលែង​ពី​តំណែង​តាម​អ៊ីមែល​។ ប៉ុន្តែវិបត្តិ​សេដ្ឋកិច្ច និង​នយោបាយ​ដែល​ឃើញ​មាន​ការ​តវ៉ា​ជាច្រើន​ខែ​មកនេះ​មិន​ងាយ​នឹង​បញ្ចប់ បន្ទាប់ពី​លោក​បានតែងតាំង​នាយករដ្ឋមន្ត្រី​ជា​មេដឹកនាំ​ស្តីទី​។​

​ក្រុមបាតុករ​បាន​ដកថយ​ចេញពី​អគារ​រដ្ឋាភិបាល​ ដែល​ពួកគេ​បាន​សម្រុក​ចូលក្នុង​រយៈ​ពេល​ប៉ុន្មាន​ថ្ងៃ​ថ្មីៗ​នេះ ខណៈ​ភាព​តានតឹង​បាន​ផ្ទុះឡើង​។ លោក​ប្រធានាធិបតី Rajapaksa បាន​ភៀសខ្លួន​ចេញពី​ប្រទេស​កាលពី​ថ្ងៃ​ពុធ​ ហើយ​បាន​ផ្ញើ​សារ​តាម​អ៊ីមែល​អំពី​ការលាលែង​ពី​តំណែង​របស់លោក​មួយថ្ងៃ​ក្រោយ​ការសន្យា​។​ ​ក្រុមបាតុករ​បាន​ជំរុញ​ឱ្យ​ប្រធានាធិបតី​លោក Rajapaksa និង​នាយករដ្ឋមន្ត្រីលោក Ranil Wickremesinghe លាលែង ហើយ​ឱ្យ​រដ្ឋាភិបាល​រួប​រួមមួយ​ដោះស្រាយ​វិបត្តិ​សេដ្ឋកិច្ច ដែល​បណ្តាលឱ្យ​មានការ​ខ្វះ​ស្បៀងអាហារ ប្រេងឥន្ធនៈ និង​តម្រូវការ​ផ្សេងៗ​ទៀត​។ កាលពី​ថ្ងៃ​ព្រហស្បតិ៍លោក Indunil Yapa ជំនួយការ​ប្រធានសភា​ប្រទេស​ស្រីលង្កា​បាន​និយាយថា លោក Rajapaksa បាន​ផ្ញើ​អ៊ីមែល​ពី​ការលាលែង​ពី​តំណែង​របស់លោក​។ ជំនួយការ​ប្រធានសភា​បាន​និយាយថា សេចក្តីប្រកាស​ជា​ផ្លូវការ​នឹងធ្វើ​ឡើង​បន្ទាប់ពី​មានការ​ពិត​ច្បាស់លាស់ និង​ស្របច្បាប់​សម្រាប់​អ៊ីមែល​របស់លោក​ប្រធានាធិបតីដែល​ត្រូវបាន​ពិនិត្យ​។

ក្រោយពី​ទទួលបាន​ពាក្យ​ថា ​លាលែង​ពី​តំណែង​ត្រូវបាន​ផ្សព្វផ្សាយ ក្រុមមនុស្ស​បាន​ប្រមូល​ផ្តុំគ្នា​នៅ​ជិត​ការិយាល័យ​ប្រធានាធិបតី​ដើម្បី​អបអរ និង​រាំ​គ្រវីទង់ជាតិ។ ក្រុមបាតុករ​បាន​ចោទប្រកាន់​លោក Rajapaksa និង​គ្រួសារ​នយោ​បាយ​ដ៏​មាន​ឥទ្ធិពល​របស់លោក​ថា ​បាន​លួច​លុយ​ពី​ស្ថាប័ន​រដ្ឋាភិបាល​អស់​រយៈពេល​ជាច្រើន​ឆ្នាំ ហើយ​ការគ្រប់គ្រងរបស់លោក​បានធ្វើ​ឲ្យ​ប្រទេស​ដួលរលំ​ដោយ​ការគ្រប់គ្រង​សេដ្ឋកិច្ច​មិន​ត្រឹមត្រូវ​។ ក្រុមគ្រួសារ​របស់លោក Rajapaksa បាន​បដិសេធ​ការចោទប្រកាន់​ពីបទ​ពុករលួយ ប៉ុន្តែ​លោក Rajapaksa បាន​ទទួលស្គាល់ថា គោលនយោបាយ​មួយចំនួន​របស់លោក​បាន​រួមចំណែក​ដល់​ការដួលរលំ​ប្រទេស៕​

អត្ថបទ៖ ប៊ុនថន