ភ្នំពេញ៖ មាតា បិតា អាណាព្យាបាលនាំយកកូនៗអាយុចាប់ពី៦ឆ្នាំ រហូតដល់ក្រោម១២ឆ្នាំ មកចាក់វ៉ាក់សាំងបង្ការជំងឺកូវីដ-១៩ ​ដូសមូលដ្ឋាន ​ដូសជំរុញទី៤ និងពលរដ្ឋចាក់វ៉ាក់សាំងដូស​ជំរុញទី៥ នៅមណ្ឌលសុខភាពទឹកថ្លា ខណ្ឌសែនសុខ រាជធានីភ្នំពេញ។

លោកវេជ្ជបណ្ឌិត ឌួង សុគន្ធា ប្រធានមណ្ឌលសុខភាពទឹកថ្លា ​បានឲ្យដឹងនាព្រឹកថ្ងៃទី១៥ ខែកក្កដា ឆ្នាំ២០២២ នេះ​ ជំរុញប្រជាពលរដ្ឋ ​ដែលមានកូនអាយុចាប់ពី៦ឆ្នាំ​ រហូតដល់ក្រោម១២ឆ្នាំ ដល់​វេណ​ត្រូវមកចាក់វ៉ាក់សាំង ដូសជំរុញទី៤ហើយនោះ ​នាំយកកូនៗ ​មកចាក់វ៉ាក់សាំងឲ្យបានគ្រប់ៗគ្នា និង​បានឆាប់រហ័ស ​ដើម្បីបង្ការ ទប់ស្កាត់ការផ្ទុះឆ្លងរីករាលដាលឡើងវិញក្នុងសហគមន៍ ដែលអាច​ធ្វើ​ឲ្យប៉ះពាល់ដល់សុខភាពសាធារណៈ ប្រព័ន្ធសុខាភិបាល ​និងសកម្មភាពសង្គម សេដ្ឋកិច្ច ដែល​កំពុង​ដំណើរការពេញលេញក្នុងពេលបច្ចុប្បន្ន។

មាតា បិតា អាណាព្យាបាលនាំយកកូនៗមកចាក់វ៉ាក់សាំងដូសមូលដ្ឋាន ដូសជំរុញទី៤ និង​ប្រជាពលរដ្ឋ​មកចាក់វ៉ាក់​ សាំងដូសជំរុញទី៥ ​នៅទីតាំងមណ្ឌលសុខភាពទឹកថ្លា បានលើកឡើង​ពី​សារប្រយោជន៍​ដែលទទួលបានវ៉ាក់សាំង ​គ្រប់ដូស ​គ្រប់ចំនួនកំណត់របស់ក្រសួងសុខាភិបាល និង​គោរពដឹងគុណប្រមុខរាជរដ្ឋាភិបាល ​ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃកម្ពុជា ​បានខិតខំរកវ៉ាក់សាំង ​មកចាក់ជូនប្រជាពលរដ្ឋពីដូសទី១ រហូតដល់ដូសទី៥។

បើតាមឯកឧត្តម វេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ​បានបញ្ជាក់ថា ការ​ចាក់វ៉ាក់សាំងជូនកុមារអាយុចាប់ពី៦ឆ្នាំ​ រហូតដល់ក្រោម១២ឆ្នាំ ​គិតត្រឹមថ្ងៃទី១៣​ ខែកក្កដា ឆ្នាំ២០២២​ គោលដៅ ២២១,១៣៦នាក់ ដូសទី៤ ​ចាក់វ៉ាក់សាំងបានចំនួន ២,៣៦៧នាក់ (១.០៧%)៕ អត្ថបទ រដ្ឋា