ភ្នំពេញ៖ សហជីបកម្មករនិយោជិត បានស្នើក្រសួងការងារ និងបណ្តុះបណ្តាលវិជ្ជាជីវៈ ឱ្យបង្កើនការចុះត្រួតពិនិត្យតាមបណ្តាក្រុមហ៊ុន សហគ្រាស អំពីការគេចវេសរបស់ភាគីនិយោជក ដែលមិនបង់ភាគទានគ្រប់ចំនួនទៅក្នុងរបបសន្តិសុខសង្គម ក្នុងការធានា​សុខុមាលភាព​របស់​កម្មករនិយោជិត។

លោក រី សិទ្ធីណែត ប្រធានសហព័ន្ធសហជីពឯករាជ្យ បានឲ្យទូរទស្សន៍ព័ត៌មាន ប៊ីធីវី ដឹងថា ស្នើឲ្យបេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈ ចុះផ្សព្វផ្សាយ ទៅដល់រោងចក្រតែម្តង ដើម្បីឲ្យបានដឹងអំពីអត្ថប្រយោជន៍ ​និងកាតព្វកិច្ច ដែល​កម្មករនិយោជិត និងនិយោជក ត្រូវមានកាតព្វកិច្ច និងទទួលបានពីការអនុវត្តរបបសន្តិសុខសង្គម ជាពិសេសរបបផ្នែកប្រាក់សោធនថ្មី ​ដែលកម្មករនិយោជិតទាំងអស់ក្នុងវិស័យឯកជននឹងត្រូវទទួល នៅពេលចាស់ធ្វើការលែងកើត ដូចទៅនឹងមន្រ្តីរាជការផងដែរ។

កាលពីរសៀលថ្ងៃទី១៤ កក្កដា ឆ្នាំ២០២២កន្លងទៅនេះ ឯកឧត្តមបណ្ឌិត អ៊ិត សំហេង រដ្ឋមន្ត្រី​ក្រសួង​ការងារ និងបណ្តុះបណ្តាលវិជ្ជាជីវៈ ​និងជាប្រធានក្រុមប្រឹក្សាភិបាល នៃបេឡាជាតិ​សន្តិសុខ​សង្គម មានប្រសាសន៍ថា​ ការបង្កើតឱ្យមានរបបផ្នែកប្រាក់សោធននេះឡើង គឺជាការយកចិត្ត​ទុកដាក់​ខ្ពស់​បំផុតរបស់រាជរដ្ឋាភិបាលកម្ពុជា ក្រោមការដឹកនាំ​ប្រកបដោយគតិបណ្ឌិត និងឈ្លាសវៃ​បំផុតពីសំណាក់សម្ដេចតេជោ ​ហ៊ុន សែន នាយករដ្ឋមន្រ្តីនៃកម្ពុជា ​ទៅលើជីវភាពរស់នៅ ក្នុង​ន័យកាត់​បន្ថយភាពក្រីក្រ ​និងធានានូវសុខុមាលភាពរបស់ប្រជាពលរដ្ឋ ​ពិសេសកម្មករនិយោជិត។

ឯកឧត្តម បានបញ្ជាក់បន្ថែមថា ​ចំពោះការចុះឈ្មោះចូលជាសមាជិក ប.ស.ស. ​ផ្នែកប្រាក់សោធន មិនមែន​ជាការស័្មគ្រចិត្តនោះទេ ប៉ុន្ដែវាជាកាតព្វកិច្ចរបស់ភាគីនិយោជក ​និងភាគីនិយោជិត ដែល​ត្រូវអនុវត្តស្របទៅតាមច្បាប់​ស្ដីពីរបបសន្ដិសុខសង្គម ដែលបានដាក់ចេញដោយរាជ​រដ្ឋាភិបាល​កម្ពុជា។

គិតមកដល់បច្ចុប្បន្ននេះរដ្ឋាភិបាលកម្ពុជាបានដាក់ចេញនូវច្បាប់ស្តីពីរបបសន្តិសុខសង្គម ជូនវិស័យ​សាធារណៈ និងវិស័យឯកជន មានដូចជា ​ផ្នែកហានិភ័យការងារ ផ្នែកថែទាំសុខភាព និងផ្នែកប្រាក់​សោធនថ្មីនេះ ​ជាចំណែកក្នុងការអភិវឌ្ឍប្រព័ន្ធ​គាំពារសង្គម ដើម្បីជាប្រយោជន៍​សម្រាប់​ប្រជាជន​គ្រប់ក្រុមគោលដៅ និងជាពិសេសបង្ការហានិភ័យខ្ពស់នៃការធ្លាក់ចូលក្នុងភាព​ក្រីក្រ​នៅពេលចូលដល់វ័យចាស់ជរា៕ អត្ថបទ ឈិត បូរ៉ាវី