​បាល់ទាត់៖ លោក Keisuke Honda បាន​សម្ដែង​នូវ​ក្ដី​រីករាយ​ជា​ខ្លាំង ចំពោះ​ការ​បន្ដ​កុងត្រា​ជាមួយ​ក្រុម​ជម្រើស​ជាតិ​កម្ពុជាក្នុងនាម​អ្នកចាត់ការ​ទូទៅ ដើម្បី​បន្ដ​ដំណើរ​ឆ្ពោះ​ទៅ​ស៊ី​ហ្គេម ឆ្នាំ​២០២៣ ដែល​កម្ពុជា​នឹង​ធ្វើ​ជា​ម្ចាស់ផ្ទះ​លើកដំបូង​ក្នុង​ប្រវត្តិសាស្ត្រ។​

​តាមរយៈ​វីដេអូ ដែល​បង្ហោះ​ដោយ​សហព័ន្ធ​កីឡាបាល់ទាត់​កម្ពុជា នៅ​ព្រឹក​ថ្ងៃ​ទី​៣១ ខែ​មីនា​នេះ អតីត​កីឡាករ​ជម្រើស​ជាតិ​ជប៉ុន​រូប​នេះ​បាន​បញ្ជាក់​ថា លោក​នឹង​ព្យាយាម​ឲ្យ​អស់ពី​លទ្ធភាព ដើម្បី​ដឹកនាំ​ក្រុម​គោព្រៃ​កម្ពុជាយកឈ្នះ​ក្រុម​ខ្លាំង​ៗ​លើ​ឆាក​អន្តរជាតិ ដ្បិត​លោក​គ្រោង​នឹង​មក​កម្ពុជា​នា​ពេល​ឆាប់ៗ​ខាងមុខ។​ គួរ​ដឹង​ថា បច្ចុប្បន្ន​លោក Keisuke Honda កំពុង​ប្រកប​អាជីព​ជាមួយ​ក្លិប Neftci PFK នៃ​ក្រប​ខណ្ឌ Azerbaijan Premier League ប្រទេស​អា​ស៊ែ​បៃ​ហ្ស​ង់ តែ​លោក​បាន​ជ្រើស​រើស​ដៃ​ស្ដាំ​របស់​ខ្លួនគឺ​លោក Ryu Hirose ដែល​ជា​គ្រូ​បង្វឹក​ក្រុម​ជម្រើស​ជាតិ​កម្ពុជា ដើម្បី​ដឹកនាំ​ផ្ទាល់ជំនួស​គ្រូ​បង្វឹក​សញ្ជាតិ​អា​ហ្ស​ង់​ទីន​លោក Felix G.Dalmas​ ដែល​បាន​ចាកចេញ។

​បច្ចុប្បន្ន​លោក Ryu Hirose កំពុង​មាន​វត្ត​មាននៅ​កម្ពុជា ហើយ​បាន​បន្ដ​ធ្វើការ​ជាមួយ​លោក Keisuke Honda ក្នុង​ការ​ជ្រើសរើស​កីឡាករ និង​រៀបចំ​ក្រុម​មុនដើម្បី​ធ្វើការ​ប្រមូលផ្ដុំ​ហ្វឹកហាត់​នាពេល​ឆាប់ៗ​ខាងមុខ ត្រៀម​បេសកកម្ម​ចំពោះ​មុខគឺ​ការប្រកួត​ជម្រុះ​ពានរង្វាន់ FIFA World Cup Qatar 2022 ជុំ​ទី​២ ក្នុង​ពូ​ល C ដែល​នៅសល់ ៣​ប្រកួត គ្រោង​បញ្ចប់​ការប្រកួត​នា​ខែ​មិថុនា​ខាងមុខនៅ​ប្រទេស​បា​រ៉ែ​ន៕

​អត្ថបទ៖ លី ឈុន​ឡា