ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ បានធ្វើការអំពាវនាវទៅដល់មន្រ្តីរាជការ អាជ្ញាធរ​គ្រប់លំដាប់ថ្នាក់ ត្រូវបំផុសចលនាប្រជាពលរដ្ឋ ឱ្យចូលរួមស្រឡាញ់ ការពារ ថែរក្សា និងបន្ត​សកម្មភាពក្នុងការដាំដើមឈើម្នាក់១ដើម ​ ឲ្យកាន់តែច្រើនជាងមុននៅតាមទីសាធារណៈ សាលារៀន តាមមន្ទីរអង្គភាព និងរដ្ឋបាលក្រុងស្រុក ។

ក្នុងពេលចូលរួមដាំដើមកូនឈើ អបអរពិធីរុក្ខទិវា ៩ កក្កដា ​ដែលបានធ្វើឡើងនៅដីព្រៃរបស់រដ្ឋ ក្នុងឃុំលាយបូរ ​ស្រុកត្រាំកក់ ខេត្តតាកែវ​ នៅព្រឹកថ្ងៃទី១៥ ខែកក្កដានេះ ​ឯកឧត្តម អ៊ូច ភា អភិបាល​ខេត្ត បានបន្តថា​ សូមអាជ្ញាធរគ្រប់លំដាប់ថ្នាក់ ​មន្រ្តីរាជការតាមមន្ទីរអង្គភាពជុំវិញខេត្ត និង​ប្រជាពលរដ្ឋ ​ត្រូវបន្តចលនាខិតខំដាំដើមឈើ​ នៅតាមទីធ្លាអគារ ​និងតាមដងផ្លូវសាធារណៈនានា ឲ្យបាន​ច្រើនជាអតិបរមា ដើម្បីជាទីដ្ឋានមានម្លប់ត្រជាក់ ត្រឈឹងត្រឈៃ​ ដល់ប្រជាពលរដ្ឋយើង ហើយ​ទន្ទឹមនឹងនេះ សហគមន៍មូលដ្ឋាន សូមចូលរួមគ្រប់គ្រងថែរក្សាការពារ ​និងដាំដុះព្រៃឈើ ដែល​អាចផ្ដល់ផលប្រយោជន៍យ៉ាងច្រើន ​ដើម្បីអភិវឌ្ឍសេដ្ឋកិច្ចសង្គម និងសម្រាប់ទ្រទ្រង់ ជីវភាពរបស់ប្រជាជន។

ឯកឧត្តម បានបន្តថា ​ការធ្វើចលនាឲ្យប្រជាជនកម្ពុជាយើងទាំងអស់គ្នា ត្រូវចូលរួមដាំដើមឈើ​ឡើងវិញ​នៅគ្រប់ទិសទី ​គឺដើម្បីបង្កើនធនធានព្រៃឈើ ​ក្នុងការរក្សានិយតភាពនៃប្រភពទឹក សម្រួល​ធាតុអាកាសឲ្យមានប្រក្រតីភាព អនុគ្រោះដល់ជីវិតរស់នៅរបស់មនុស្ស-សត្វ និងអំណោយផល​ដ៏ប្រសើរ ​ដល់ការដាំដុះដំណាំសព្វសារពើរបស់ប្រជាកសិករ។

ឯកឧត្តម អ៊ូច ភា​ បានក្រើនរំលឹកបន្ថែមផងដែរទៅដល់មន្រ្តីពាក់ព័ន្ធ ​ក៏ដូចជាអាជ្ញាធរមូលដ្ឋាន និង​កងកម្លាំងប្រដាប់អាវុធទាំងអស់ ត្រូវតែចូលរួមសហការគ្នាក្នុងការ​ទប់ស្កាត់​ការកាប់​ទន្រ្ទានដី​ព្រៃរបស់រដ្ឋ ​និងបង្រ្កាបបទល្មើសព្រៃឈើនេះឱ្យដូចជាភ្លៀងរលឹម ៕អត្ថបទ៖ គុជ វិភាគ