ពោធិ៍សាត់៖ បើតាមរបាយការណ៍ពីមន្ទីរធនធានទឹក ​និងឧតុនិយមខេត្តពោធិ៍សាត់ បានឱ្យដឹងថា គិតត្រឹមព្រឹក ថ្ងៃទី១៥ ខែកក្កដា ឆ្នាំ២០២២នេះ ​កម្ពស់ទឹកស្ទឹងពោធិ៍សាត់ នៅក្រុងពោធិ៍សាត់ បានឡើងដល់កម្ពស់ ៥.៣០ម៉ែត្រ ហួសពីកំរិតប្រកាសអាសន្នដែលមានកម្ពស់ត្រឹមតែ៥ម៉ែត្រ ។

មន្ទីរធនធានទឹក និងឧតុនិយមខេត្តក៏បានចេញសេចក្តីជូនដំណឹងដល់ប្រជាពលរដ្ឋក្នុងខេត្ត ជា​ពិសេសអ្នករស់នៅតាមដងស្ទឹង សូមបង្កើនការប្រុងប្រយ័ត្នខ្ពស់ ​ជៀសវាង​នូវគ្រោះថ្នាក់ផ្សេងៗ​និងសូមត្រៀមរកទីទួលសុវត្ថិភាព ។

លោក កែវ វ័យ ប្រធានមន្ទីរធនធានទឹក ​និងឧតុនិយមខេត្ត បានអោយដឹងថា ទោះជាកម្ពស់​ទឹក​ស្ទឹងពោធិ៍សាត់ ផ្នែកខាងក្រោម​ ក្នុងក្រុងពោធិ៍សាត់ ​និងស្រុកកណ្តៀង បានឡើងខ្ពស់ហួស​ពី​កម្ពស់ប្រកាសអាសន្នក៏ដោយ​ តែអាចនឹងស្រកទៅវិញឆាប់ៗ ព្រោះកម្ពស់ទឹកស្ទឹងផ្នែកខាងលើ ក្នុងស្រុកវាលវែង ​និងស្រុកភ្នំក្រវាញ បានស្រកចុះវិញហើយ ​គិតត្រឹមព្រឹកថ្ងៃទី១៥ ខែកក្កដា ឆ្នាំ២០២២នេះ ។

តែបើមានភ្លៀងធ្លាក់ច្រើនបន្តទៀត ​នៅឯស្រុកភ្នំក្រវាញ និងស្រុកវាលវែង នោះអាចនឹងមាន​គ្រោះទឹកជំនន់​នៅក្រុងពោធិ៍សាត់ ​និង ស្រុកកណ្តៀង ។

កម្ពស់ទឹកស្ទឹង ផ្នែកខាងលើ គិតត្រឹមព្រឹក ថ្ងៃទី១៥ ខែកក្កដា ឆ្នាំ២០២២

-សឹ្ទងក្រវាញ មានកម្ពស់ 2 .58ម កម្ពស់ប្រកាសអាសន្ន 6.00ម

-សឹ្ទងវាលវែង មានកម្ពស់ 1.20ម កម្ពស់ប្រកាសអាសន្ន 9.00ម

អាជ្ញាធរខេត្តពោធិ៍សាត់ ដែលមាន លោក ចេង ឡៃ អភិបាលរងខេត្តតំណាង ឯកឧត្តម ជាវ តាយ អភិបាលនៃគណៈអភិបាលខេត្តបានដឹកនាំមន្ត្រីជំនាញនិងកងកម្លាំង ចុះពិនិត្យស្ថានភាពជាក់ស្តែង​ពីកម្ពស់ទឹកស្ទឹងពោធិ៍សាត់នៅ ​ក្រុងពោធិ៍សាត់ និងស្រុកកណ្តៀង ហើយអាជ្ញាធរខេត្តបាន​ប្រជុំ​រៀបចំ​កម្លាំងរួចជាស្រេចហើយ ត្រៀមចាំ​អន្តរាគមន៍​ជួយប្រជាពលរដ្ឋក្នុងករណី​មាន​គ្រោះទឹកជំនន់​កើតឡើង ៕អត្ថបទ៖ ពៅ ភិរុណ