ភ្នំពេញ ៖ កម្លាំងនគរបាលប្រឆាំងបទល្មើសគ្រឿងញៀនបានបង្ក្រាបមុខសញ្ញាស្តុកទុក និងចែកចាយឧបករណ៍បារីអេឡិចត្រូនិចជាង៥០០០ដើម នៅទីតាំងផ្សេងៗគ្នាចំនួន៣កន្លែងក្នុងភូមិសាស្ត្ររាជធានីភ្នំពេញ។

មនុស្សចំនួន៣នាក់ត្រូវបាននគរបាលប្រឆាំងបទល្មើសគ្រឿងញៀន ធ្វើការឃាត់ខ្លួនអប់រំ និងធ្វើកិច្ចសន្យាបញ្ឈប់ធ្វើអាជីវកម្មទាក់ទិននឹងករណីស្តុកទុក និងចែកចាយឧបករណ៍បារីអេឡិចត្រូនិចជាង៥០០០ដើម។ នេះបើតាមរបាយការណ៍របស់មន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ។

របាយការណ៍នគរបាលបានឱ្យដឹងថា ការបង្ក្រាបករណីនេះ គឺធ្វើឡើងកាលពីថ្ងៃទី១៣ ខែកក្កដា ឆ្នាំ២០២២ ដោយបានស្រាវជ្រាវ និងបង្ក្រាបគោលដៅលក់ឧបករណ៍បារីអេឡិចត្រូនិចចំនួន០៣គោលដៅជាបន្តបន្ទាប់ គឺគោលដៅទី១នៅខាងមុខច្រកផ្លូវចូលទៅតំបន់បឹងស្នោរ សង្កាត់និរោធ ខណ្ឌច្បារអពៅ រាជធានីភ្នំពេញ ដែលជាទីតាំងចែកចាយ។ ទីតាំងទី២ នៅចំណុច ផ្ទះលេខ៣០ ផ្លូវ P១០F បូរីប៉េងហួតបឹងស្នោ ស្ថិតក្នុងភូមិបឹងឈូក សង្កាត់និរោធ ខណ្ឌច្បារអំពៅ ជាទីតាំងដាក់តាំងលក់ឧបករណ៍បារីអេឡិចត្រូនិច។ និងទីតាំងទី៣នៅចំណុច ផ្ទះលេខ ៩៧ ផ្លូវលេខM០២ បុរីប៉េងហួតបឹងស្នោ ស្ថិតក្នុងភូមិបឹងឈូក សង្កាត់និរោធ ខណ្ឌច្បារអំពៅ ជាទីតាំងស្តុកឧបករណ៍បារីអេឡិចត្រនិច។

ចំពោះលទ្ធផលបង្ក្រាបនគរបាលបានឱ្យដឹងថា បានអញ្ជើញមនុស្ស ០៣នាក់យកទៅអប់រំ និងធ្វើកិច្ចសន្យាបញ្ឈប់ការធ្វើអាជីវកម្ម រួចអនុញ្ញាតឱ្យវិលត្រឡប់ទៅលំនៅដ្ឋានវិញ ចំពោះវត្ថុតាងចាប់យកមានឧបករណ៍សម្រាប់ជក់ប្រភេទ YOOZ ហៅ E.CIGARETTE ចំនួន ៨៦កេស ស្មើ ៥៤០០ដើម ទឹកសម្រាប់ជក់ ចំនួន១០៥កេស ស្មើ ៤០៥០ប្រអប់ ដែលមាន ១២១៥០ដប ។ វត្ថុតាងដែលបានចាប់យក នគរបាលបានរក្សាទុកនៅមន្ទីរប្រឆាំងគ្រឿងញៀន រង់ចាំមានគោលការណ៍ពីថ្នាក់ដឹកនាំយកទៅបំផ្លាញចោលនាពេលក្រោយ៕ អត្ថបទ ៖ ប្រាក់ តារាវុទ្ធី