សហរដ្ឋអាមេរិក៖ ទីក្រុងវ៉ាស៊ីនតោនបាននិយាយ នៅក្នុងសេចក្ដីថ្លែងការណ៍មួយកាលពីថ្ងៃអង្គារថា ក្រសួងការបរទេសសហរដ្ឋអាមេរិកបានបញ្ជា ឲ្យអ្នកការទូតដែលមិនមានការងារចាំបាច់ចាកចេញពីមីយ៉ាន់ម៉ា ស្របពេលមានការបង្ក្រាបទៅលើក្រុមបាតុករ ដែលបានសម្លាប់មនុស្សរាប់រយនាក់ ចាប់តាំងពីរដ្ឋប្រហារយោធាបានចាប់ផ្ដើម។
ការជួបជុំគ្នាតវ៉ាជារៀងរាល់ថ្ងៃនៅទូទាំងសហភាពមីយ៉ាន់ម៉ា ដោយក្រុមបាតុករដែលគ្មានអាវុធក្នុងដៃកំពុងទាមទារឲ្យប្រគល់អំណាច ជូនដល់រដ្ឋាភិបាលជាប់ឆ្នោតវិញ និងការដោះលែងមេដឹកនាំស៊ីវិលលោកស្រី Aung San Suu Kyi បានប្រឈមជាមួយឧស្ម័នបង្ហៀរទឹកភ្នែក កាំភ្លើងគ្រាប់ជ័រ និងកាំភ្លើងគ្រាប់ពិត។ ក្រសួងការបរទេសខាងលើបាននិយាយ នៅក្នុងសេចក្ដីថ្លែងការណ៍មួយដោយប្រើឈ្មោះសហភាពមីយ៉ាន់ម៉ាថា ជាប្រទេសភូមាថា យោធាភូមាបានឃុំខ្លួន និងទម្លាក់ក្រុមមន្ត្រីរដ្ឋាភិបាលជាប់ឆ្នោត។ ការតវ៉ា និងបាតុកម្មប្រឆាំងនឹងរបបគ្រប់គ្រងយោធាបានកើតឡើង ហើយត្រូវបានគេរំពឹងថានឹងបន្ត។
ចំនួនអ្នកស្លាប់ជាជនស៊ីវិលពីការបង្ក្រាបរបស់យោធា រហូតមកដល់នេះបានកើនឡើងដល់ ៥២០នាក់ ខណៈដែលប្រទេសមហាអំណាចនានាបានថ្កោលទោស ចំពោះយុទ្ធនាការរបស់យោធាបន្ទាប់ពីមានរដ្ឋប្រហារថ្ងៃទី១ ខែកុម្ភៈកន្លងមកនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
