ភ្នំពេញ៖ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី១៤ ខែកក្កដានេះ បានទទួលជួបជាមួយលោក Ozawa Yoshinori ប្រធានសម្ព័ន្ធសមាគម Shiho-Shoshi ជប៉ុន (JFSSLA) និងចុះហត្ថលេខាលើអនុស្សារណៈ ស្ដីពីកិច្ចសហប្រតិបត្តិការថ្មី ។

ឯកឧត្តមឧបនាយករដ្ឋមន្ត្រី ជា សុផារ៉ា បានកោតសរសើរ និងវាយតម្លៃខ្ពស់ចំពោះសមិទ្ធផល​ទាំង​ឡាយ ដែលកើតចេញពីកិច្ចសហប្រតិបត្តិការប្រកបដោយភាពជោគជ័យ ​រវាងក្រសួងរៀបចំដែនដី នគរូបនីយកម្ម និងសំណង់ នៃព្រះរាជាណាចក្រកម្ពុជា ​និងសម្ព័ន្ធសមាគមShiho-Shoshiជប៉ុន តាំងពីឆ្នាំ ​២០១៣មកម៉្លេះ ​ហើយការជួបជុំដ៏មានសារសំខាន់នាពេលនេះ នឹងសម្រេចបាននូវ​អនុស្សរណៈ ​ស្តីពីកិច្ចសហប្រតិបត្តិការលើកទី១០ សម្រាប់រយៈពេលមួយឆ្នាំបន្តទៀតប្រកប​ដោយ​ជោគជ័យ។

ឯកឧត្ដម បានសម្ដែងការអបអរសាទរដល់លោកស្រី Kanetake Emiko បន្តអាណត្តិថ្មីជាទីប្រឹក្សា​នៃ​ក្រសួងរៀបចំដែនដី ​នគរូបនីយកម្ម ​និងសំណង់ ​ដែលលោកស្រី បានរួមចំណែកក្នុងកិច្ចអភិវឌ្ឍន៍​ប្រទេសកម្ពុជា​ ក៏ដូចជាចូលរួមបំពេញបេសកកម្មសម្រេចគោលដៅ​ធំៗរបស់ក្រសួង មានជាអាទិ៍ ចូលរួម​ចំណែកតាក់តែងច្បាប់​ ស្ដីពីសំណង់ឆ្នាំ២០១៩ សម្របសម្រួលការផ្ដល់ហិរញ្ញប្បទាន​ឥតសំណង​ពីរដ្ឋាភិបាលជប៉ុន ​ដើម្បីកសាងស្ថានីយវាស់វែងដោយផ្កាយរណប និងមន្ទីរពិសោធន៍​សំណង់​ជាតិ ក្នុងនាមរាជរដ្ឋាភិបាលកម្ពុជា។

ឯកឧត្តម Mikami Masashiro ​ឯកអគ្គរាជទូតជប៉ុនប្រចាំកម្ពុជា ​បានថ្លែងអំណរគុណដល់ឯកឧត្តម ឧបនាយករដ្ឋមន្ត្រី ជា សុផារ៉ា ក្នុងកិច្ចខិតខំប្រឹងប្រែងជំរុញការងារលើកិច្ចសហប្រតិបត្តិការ រវាងកម្ពុជា និងជប៉ុនប្រកបដោយផ្លែផ្កា។

លោកOzawa Yoshinori ប្រធានសម្ព័ន្ធសមាគម Shiho-Shoshi ជប៉ុន បានបញ្ជាក់ថា ឆ្នាំនេះ បន្ត​ចុះអនុស្សារណៈជាឆ្នាំទី២ បន្ទាប់ពីសម្រចបាន​សមិទ្ធផល​ការងាររបស់ទីប្រឹក្សា​សម្ព័ន្ធ​សមាគម Shiho-Shoshiជប៉ុន មានដូចជា ទី១ ​ការងារសម្របសម្រួលកិច្ចសហប្រតិបត្តិការ ទី២ ការងារសុរិយោដី ​និងភូមិសាស្រ្ត ទី៣​ ការងារសំណង់ ​ទី៤ ​ការងារលំនៅឋាន និងទី៥ ការងារ​រៀបចំដែនដី ​និងនគរូបនីយកម្ម៕អត្ថបទ៖ យន់ វ៉ាន់