​រុស្ស៊ី៖ ក្រសួងការពារជាតិ​រុស្ស៊ី​បាន​និយាយថា កងកម្លាំង​រុស្ស៊ី​បាន​បើក​ការវាយប្រហារ​ចំ​គោលដៅ​ជាច្រើន​កន្លែង ​លើ​ចំណុច​ដាក់​ពង្រាយ​បណ្តោះអាសន្ន​របស់​កងក​ម្លាំ​ង​អ៊ុយ​ក្រែ​ន​នៅក្នុង​ទីក្រុង Nikolaev, Kharkiv និង Donetsk ដោយ​អះអាងថា ​បាន​បំផ្លាញ​កង​អង្គភាព​កាំភ្លើង​ធំ​បាញ់​គ្រាប់​រ៉ុក្កែត និង​កាំភ្លើង​ធំ​ផ្លោង M77 ផលិត​ដោយ​សហរដ្ឋអាមេរិក​។

​កងកម្លាំងប្រដាប់អាវុធ​ក្នុង​តំបន់ ​Lugansk បាន​បញ្ចេញ​វីដេអូ​មួយ​តាម​ប្រព័ន្ធ​ផ្សព្វផ្សាយ​សង្គម​របស់ខ្លួនដោយប្រកាសថា ពួកគេ​រឹបអូស​បានជា​លើកដំបូង​នូវ​កាំភ្លើង​ធំ​ផ្លោង M77 ផលិត​ដោយ​សហរដ្ឋអាមេរិក​។​ យោងតាម​ការរាយការណ៍​ពី​សារព័ត៌មាន RIA Novosti បាន​ឲ្យ​ដឹងថា អ៊ុយ​ក្រែ​ន​បាន​និយាយថា ​ពួកគេ​បាន​វាយប្រហារ​ស្ថានីយ រថយន្តក្រុង​មួយ​នៅ​ជាយ​តំបន់ Donetsk បណ្តាល​ឱ្យ​មាន​អ្នកស្លាប់​ និង​រង​របួស​។ អាជ្ញាធរ​តំបន់​បាន​អះអាងថា អាវុធ​នោះ​ជា​កាំភ្លើង​ធំ M777 ផលិត​ដោយ​សហរដ្ឋអាមេរិក​។

​អ្នកនាំពាក្យ​ក្រសួងការបរទេស​រុស្ស៊ីលោកស្រី Maria Zakharova បាន​និយាយថា អ៊ុយ​ក្រែ​ន​បាន​វាយ​ប្រហារ​ទីតាំង​ជាច្រើន​កន្លែង​នៅ​តំបន់​ Donbas ដោយ​ប្រើប្រាស់​ប្រព័ន្ធ​រ៉ុក្កែត​កាំភ្លើង​ធំ​សមត្ថភាព​ខ្ពស់ ​M142 (HIMAS) របស់​សហរដ្ឋ​អាមេរិក​។ អាមេរិក​បាន​បញ្ជូន​បុគ្គលិក​ដោយ​សម្ងាត់ ​ទៅ​បណ្តុះបណ្តាល​ទាហាន​អ៊ុយ​ក្រែ​ន​អំពី​របៀប​ប្រើប្រាស់​ប្រព័ន្ធ​រ៉ុក្កែត​នេះ​៕

អត្ថបទ៖ ប៊ុនថន