ភ្នំពេញ៖ ឯកឧត្តមបណ្ឌិត អេ ខេ អាប់ឌុល ម៉ូមិន រដ្ឋមន្ត្រីការបរទេសបង់ក្លាដែស នៅព្រឹក​ថ្ងៃទី​១៦ ខែកក្កដា ឆ្នាំ២០២២ អញ្ជើញទៅពិនិត្យ «វិថីបង់ហ្គាបាន់ឌូ សេក្ខ មូជីប» ដែល​ស្ថិត​នៅ​លើ​ផ្លូវ​លេខ​៣៣៧ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។

គួរបញ្ជាក់ថា ដើម្បីជាសក្ខីភាព នៃទំនាក់ទំនងដ៏ល្អប្រសើររវាប្រជាជន និង​រដ្ឋាភិបាល នៃ​ប្រទេស​កម្ពុជា-បង់ក្លាដែស ដោយភាគីរដ្ឋាភិបាលបង់ក្លាដែស សម្រេចយកព្រះបរមនាមរបស់ព្រះករុណា ព្រះ​មហាវីរក្សត្រ ព្រះវររាជបិតាជាតិខ្មែរ សម្តេចព្រះនរោត្តមសីហនុ “ព្រះបរមរតនកោដ្ឋ” ដាក់​ឈ្មោះ​ផ្លូវ​មួយនៅតំបន់អគារស្ថាប័នរដ្ឋ ក្នុងទីក្រុងដាកា ។

ចំណែក​កម្ពុជា បានកំណត់យកផ្លូវក្រាលកៅស៊ូមួយខ្សែ (ផ្លូវ៣៣៧) ដែល​មាន​បណ្តោយ​ប្រវែង​១ ៣១០ម៉ែត្រ និងទទឹងប្រវែង ១៧ម៉ែត្រ ស្ថិតនៅក្នុងសង្កាត់បឹងកក់ទី១ ខណ្ឌទួលគោក សម្រាប់​ដាក់​ឈ្មោះបិតាជាតិរបស់បង់ក្លាដែស គឺ (វិថីបង់ហ្គាបាន់ឌូ សេក្ខ មូជីប) ។

សម្រាប់​បង្ហាញជាមិត្តភាព និងកិច្ចសហប្រតិបត្តិការល្អ វិថី និងមហាវិថីមួយចំនួន នៅ​ក្នុង​រាជ​ធានី​ភ្នំពេញ ក៏មានដាក់ឈ្មោះបុគ្គលសំខាន់ ឬឈ្មោះប្រទេសមួយចំនួនផងដែរ ដូចជា​មហា​វិថី​ម៉ៅស៊ីទុង, មហាវិថីសហព័ន្ធរុស្ស៊ី, មហាវិថីហាណូយ និងវិថីហ្សាដឺហ្គោលជាដើម ៕ អត្ថបទ៖ បាន សុខរិទ្ធិ