ភ្នំពេញ៖ នៅក្នុងអំឡុងពេលដែលកម្ពុជា កំពុងជួបប្រឈមការរាតត្បាតកូវីដ១៩ អស់រយៈពេល២ឆ្នាំកន្លងមកនេះ ជាពិសេសចាប់តាំងពីប្រមុខថ្នាក់ដឹកនាំរាជរដ្ឋាភិបាលកម្ពុជា ប្រកាសបើកទេសចរណ៍ឡើងវិញ រហូតមកដល់ពេលនេះ ក្រសួងទេសចរណ៍បានប្រកាស​រកឃើញតំបន់អេកូទេសចរណ៍ វប្បធម៌ និងតំបន់ទេសចរណ៍ធម្មជាតិ​ជាច្រើនទៀត តាមរយៈការអញ្ជើញទៅលេងកម្សាន្តពីសំណាកពលរដ្ឋ និងភ្ញៀវទេសចរនៅក្នុងស្រុក ។

បើតាមលោក ជុក ជំនោរ ប្រធាននាយកដ្ឋានអភិវឌ្ឍន៍ទេសចរណ៍នៃក្រសួងទេសចរណ៍ បានថ្លែងប្រាប់ BTV នៅថ្ងៃទី១៦ ខែកក្តដានេះ ថា ជាក់ស្តែងនៅទូទាំងប្រទេសកម្ពុជា គឺមាន​តំបន់ទេសចរណ៍ធម្មជាតិ មានសក្តានុពលខ្លាំង និងមានភាពទាក់ទាញច្រើនកន្លែង​ដែល​ក្រសួងទេសចរណ៍​នៅមិនទាន់បានដឹង ហើយចាប់តាំងពីពិភពលោកជួបវិបត្តិកូវីដ១៩ ភ្ញៀវទេសចរ​មិនអាចចេញដំណើរកម្សាន្តទៅក្រៅប្រទេសបាន គឺយើងឃើញថា មានតំបន់ទេសចរណ៍ធម្មជាតិ​ជាច្រើនកន្លែងនៅកម្ពុជា ដែលក្រសួងមិនទាន់បានដឹងនោះ គឺមានពលរដ្ឋជាច្រើនអញើញ​ទៅ​លេងកម្សាន្ត ខណៈកាលពីមិនទាន់មានមេរោគកូវីដរាតត្បាតសំគាល់ឃើញថា ពលរដ្ឋនិងទេសចរក្នុងស្រុកភាគច្រើននាំគ្នាសំរុកទៅលេងកម្សាន្តតែនៅខេត្តសៀមរាប កំពត កែប ខេត្តព្រះសីហនុជាដើម។

លោក ថ្លែងថា សម្រាប់តំបន់ទេសចរណ៍ធម្មជាតិមួយចំនួនមានភាពទាក់ទាញខ្លាំង​ដែល​ទើបបានរកឃើញថ្មីមានដូចជាតំបន់ទេសចរណ៍ខ្នងផ្សារនៅខេត្តកំពង់ស្ពឺ​ តំបន់ភ្នំឱរាល់ តំបន់វាលធំនៅខេត្តរតនគិរី និងតំបន់កសិទេសចរណ៍ និងរីស៊តនានាដែលបង្កើតឡើងពលរដ្ឋដែលមានធនធានជាដើម ៕​អត្ថបទ ស៊ុម សុខជា