បាល់ទាត់៖ អ្នកចាំទីគិរីវង់សុខសែនជ័យ ហេង បូរ៉ា បានបង្ហាញអារម្មណ៍រីករាយ ដែលត្រូវបានក្លិបដាក់ឲ្យចូលលេងក្នុងការប្រកួតផ្លូវការ លើកដំបូងពេលប៉ះភ្នំពេញក្រោន។ យ៉ាងណាគេក៏អាក់អន់ស្រពន់ចិត្តខ្លួនឯងដែរ ដែលមិនអាចជួយក្រុមទទួលបានលទ្ធផលល្អ។
នេះជាការបង្ហាញខ្លួនក្នុងការប្រកួត Metfone Cambodian League លើកដំបូងសម្រាប់កីឡាករវ័យក្មេងផ្លាស់ពី ក្រុមយុវជនសសមាគមកីឡាបាល់ទាត់កងយោធពលខេមរភូមិន្ទ។ កាលនៅទ្រនំចាស់ គេបានចូលលេងតែក្នុងការប្រកួត League 2 ប៉ុណ្ណោះ។ បន្ទាប់ពីចូលចាប់បាល់ក្នុងការប្រកួតផ្លូវការកាលថ្ងៃសៅរ៍ ទី២៧ ខែមីនា កីឡាករមានកំណើតនៅខេត្តតាកែវទទូចថា មិនភ័យព្រួយអ្វីឡើយ ព្រោះបានហ្វឹកហាត់ត្រៀមយ៉ាងល្អ។ ប៉ុន្តែគេទទួលស្គាល់នៅមានកង្វះខាតយ៉ាងច្រើន ពោលទើបបានត្រឹម ៥០% ប៉ុណ្ណោះនៃការចង់បាន។ គេថា នៅមិនទាន់អាចប្រើជើងបានល្អនៅឡើយ ដូច្នេះត្រូវព្យាយាមពង្រឹងបន្ថែម។
ទោះចាញ់ ១ទល់នឹង២ មែនគេសង្កេតឃើញថា ហេង បូរ៉ា បានជួយការពារសំណាញ់ទីគិរីវង់យ៉ាងច្រើន ពីការប៉ុនប៉ងរបស់កីឡាករភ្នំពេញក្រោន ដូចជាការទាត់ពីខ្សែបម្រើ ប្រាក់ ធីវ៉ា និងខ្សែប្រយុទ្ធ Matheus Souza E. Silva ជាដើម។ ហេង បូរ៉ា បានឈានជើងចូលហ្វឹកហាត់ បាល់ទាត់លក្ខណៈអាជីពលើកដំបូងកាលឆ្នាំ២០១៦ នៅក្រុម U19 សមាគមកីឡាបាល់ទាត់កងយោធពលខេមរភូមិន្ទ មុនផ្ទេរទៅគិរីវង់សុខសែនជ័យរដូវកាល២០២១ នេះ។ គេក៏ធ្លាប់ចូលលេងនៅតាមក្រុមមិនមែនអាជីពមួយចំនួន ដើម្បីសម្រួចបទពិសោធន៍ផ្ទាល់ខ្លួនផងដែរ៕
អត្ថបទ៖ CNCC
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
