​​តេ​ក្វាន់​ដូ​៖ ការប្រកួត​កីឡា​តេ​ក្វាន់​ដូ​ដណ្ដើម​ពានរង្វាន់​ ឯកអគ្គរដ្ឋទូត​សាធារណរដ្ឋ​កូរ៉េប្រចាំឆ្នាំ​២០២២ បាន​បញ្ចប់​ហើយ ក្រោយ​ដំណើរការ​ប្រកួត​រយៈពេល ២​ថ្ងៃ​កាលពី​ចុង​សប្ដាហ៍​កន្លងទៅនៅ​ពហុ​កីឡដ្ឋាន​ជាតិ​អូឡាំពិក ក្រោម​ការរៀបចំ​របស់​ខេ​មរ​សហព័ន្ធ​តេ​ក្វាន់​ដូ​ WT ​សហការ​ជាមួយ​ស្ថានទូត​សាធារណរដ្ឋ​កូរ៉េ​ប្រចាំ​នៅ​កម្ពុជា។​

​គោលបំណង​សំខាន់នៃ​ការប្រកួត​នេះ គឺ​ដើម្បី​ជាការ​ថ្លែងអំណរគុណ​ដ​ល់​ឯកអគ្គរដ្ឋទូត​សាធារណរដ្ឋ​កូរ៉េ ដែល​បាន​បានផ្ដល់​គ្រូបង្វឹក​កម្រិត​ខ្ពស់​លោក​ Choi Yong Sok ​មកជួយ​អភិវឌ្ឍន៍​ប្រភេទ​កីឡា​អូឡាំពិក​មួយ​នេះ​នៅ​កម្ពុជា ឲ្យ​មានការ​រីកចម្រើន និង​ដណ្ដើមបាន​មេដាយ​ដ៏​ច្រើន​ជា​បន្ដបន្ទាប់ ក្នុង​ព្រឹត្តិការណ៍​ធំៗ​លើ​ឆាក​អន្ដរជាតិ ក៏ដូចជា​ដើម្បី​ជំរុញ​ការអភិវឌ្ឍ​វិស័យ​កីឡា​តេ​ក្វាន់​ដូ​ WT ​ឲ្យ​កាន់តែ​រីកចម្រើន​បន្ថែមទៀត។​ ​សម្រាប់​ការ​ត្រឡប់មក​រៀបចំ​ការប្រកួត​ផ្ទាល់ បន្ទាប់ពី​រៀបចំ​ការប្រកួត​តាម​ Online ​ដោយសារ​បញ្ហា​កូ​វីដ​-១៩ កាលពី​ឆ្នាំ​២០២១ នេះគឺមាន​ប្រតិភូ គ្រូបង្វឹក និង​កីឡាករ​-​កីឡាការិនី​សរុប ១៧៣​នាក់មកពីក្រសួង និង​សមាគម​/​ក្លិប​ចំនួន ២២​ចូលរួម​ប្រកួត។ រីឯ​ពិធី​បិទក៏មាន​ការអញ្ជើញ​ចូលរួម​ពី​ឯកឧត្តម​បណ្ឌិត​ Park Heung kyeong ​ឯកអគ្គរដ្ឋទូត​សាធារណរដ្ឋ​កូរ៉េ​ប្រចាំ​កម្ពុជា និង​លោក ម៉ិ​ល កាដូ អគ្គនាយករងអគ្គនាយកដ្ឋាន​កីឡា​ផងដែរ។​

​ចំពោះ​លទ្ធផល​នៃ​ការប្រកួតគឺ​ក្លិប​កីឡា​តេ​ក្វាន់​ដូ​ WT ​ពិភពថ្មី​ឈ្នះ​មេដាយ​ច្រើនជាងគេ រួមមាន​មេដាយមាស៥ ប្រាក់២ និង​សំរឹទ្ធ៤ ខណៈ​ក្លិប​កីឡា​តេ​ក្វាន់​ដូ​ WT BT ​ដណ្តើមបាន​មេដាយមាស៤ និង​សំរឹទ្ធ១ ឈរ​លេខ​រៀង​ទី​២ និង​ក្លិប​កីឡា​តេ​ក្វាន់​ដូ​ WT ​មិត្តភាពឈរ​លេខ​រៀង​ទី​៣ ដណ្តើមបាន​មេដាយមាស៣ ប្រាក់១ និង​សំរឹទ្ធ ២​គ្រឿង។ ក្រៅពីនេះក៏មាន​ក្លិប​មួយចំនួនធំ​ទៀតដណ្ដើមបាន​មេដាយមាស ប្រាក់ និង​សំរឹទ្ធជាច្រើន​ផងដែរ ដែល​ត្រូវបាន​សហព័ន្ធ​វាយតម្លៃថា ការប្រកួត​ឆ្នាំនេះទទួលបាន​ជោគជ័យ​គួរ​ឲ្យ​កត់សម្គាល់៕

​អត្ថបទ៖ លី ឈុន​ឡា​