​ស្រីលង្កា៖ ជួរ​ដ៏​វែង​បាន​បន្ត​នៅ​ខាងក្រៅ​ស្ថានីយ​ប្រេងឥន្ធនៈ​ក្នុង​ទីក្រុង​កូឡុំបូកាលពី​ថ្ងៃអាទិត្យ ​ក្នុងពេល​មាន​ភាពចលាចល​នយោបាយ​ដែល​កំពុង​បន្ត​នៅ​ប្រទេស​ស្រីលង្កា​។ ការជជែក​ដេញដោល​ជា​ញឹកញាប់​បាន​កើតឡើង​ក្នុងចំណោម​អ្នក​ដែល​រង់ចាំ​នៅក្នុង​ជួរ ខណៈ​កង្វះខាត​ប្រេងឥន្ធនៈ​បានធ្វើ​ឲ្យ​ប៉ះពាល់​ដល់​សាធារណជន​យ៉ាងខ្លាំង​។

និយាយ​ទៅកាន់​សារព័ត៌មាន The Associated Press នៅ​ខាងក្រៅ​ស្ថានីយប្រេងឥន្ធនៈ អ្នកបើកបរ ​TukTuk ម្នាក់បាន​ត្អូញត្អែរថា ពេលខ្លះ​លោក​ត្រូវ​រង់ចាំ​រហូតដល់​បួន​ថ្ងៃ​ដើម្បី​ចាក់​ប្រេង​។ លោក​និយាយថា ការចំណាយ​របស់លោក​លើ​ប្រេងឥន្ធនៈ មានន័យថា​លោក​មិនអាច​ផ្តល់ប្រាក់​ចំណូល​ដល់​គ្រួសារ​របស់លោក​បាន​នោះទេ​។​ ​ជាមួយគ្នានេះដែរ សមាជិកសភា​បានចាប់ផ្តើម​ជ្រើសរើស​មេដឹកនាំ​ថ្មី បន្ទាប់ពី​ប្រធានាធិបតី​បាន​ភៀសខ្លួន​ចេញទៅ​ក្រៅប្រទេស មុនពេល​លាលែង​ពី​តំណែង បន្ទាប់ពី​មានការ​តវ៉ា​ទ្រង់ទ្រាយ​ធំ​ជុំវិញ​ការដួលរលំ​សេដ្ឋកិច្ច​របស់​ប្រទេស​។ កាលពី​ថ្ងៃ​សុក្រ នាយករដ្ឋមន្ត្រីលោក Ranil Wickremesinghe បាន​ស្បថ​ចូលកាន់​តំណែង​ជា​ប្រធានាធិបតី​ស្តីទី រហូតដល់​សភាជ្រើស​រើស​អ្នក​បន្ត​តំណែង​ពី​លោក Gotabaya Rajapaksa ដែល​អាណត្តិ​របស់លោក​នឹង​បញ្ចប់​នៅ​ឆ្នាំ២០២៤​។ ប្រធានសភាលោក Mahinda Yapa Abeywardana បាន​សន្យាថា ដំណើរការ​នយោបាយ​លឿន និង​មាន​តម្លាភាពនឹងធ្វើ​ឡើង​ក្នុង​រយៈពេល​មួយ​សប្តាហ៍​។​ ​ប្រធានាធិបតី​ថ្មី​អាច​តែងតាំង​នាយករដ្ឋមន្ត្រី​ថ្មី ​ដែល​បន្ទាប់មក​នឹងត្រូវ​អនុម័តដោយ​សភា​។​ ​ប្រទេស​ស្រីលង្កា​ខ្វះ​ថវិកា​ ដើម្បី​ចំណាយ​លើ​ការ​នាំចូល​សម្ភារ​ចាំបាច់​ជា​មូលដ្ឋាន​ ដូចជា​ស្បៀងអាហារ ជី និង​ប្រេងឥន្ធនៈ​ដល់​ប្រជាជន​របស់ខ្លួន ​២២​លាន​នាក់​ដែល​អស់សង្ឃឹម៕

អត្ថបទ៖ ប៊ុនថន