​ប្រណាំង​កង់៖ ​កីឡាករ​ប៊ែ​ល​ហ្ស៊ិ​ក Jasper Philipsen បាន​ប្រជែង​ឈ្នះ​ដំណាក់កាល​ទី១៥ នៃ​ព្រឹត្តិការណ៍​ប្រណាំង​កង់ Tour de France ខណៈ​កីឡាករ​ដា​ណឺ​ម៉ាក Jonas Vingegaard នៅតែ​បន្ត​នាំមុខ​រួម​ដដែល​។

​​ដំណាក់កាល​ទី១៥ ដែលមាន​ចំងាយ​ផ្លូវ ២០២.៥គីឡូម៉ែត្រ កីឡាករ​របស់​ក្រុម​ប្រណាំង​របស់​ក្រុម Alpecin-Deceunick, Jasper Philipsen បានមក​ដល់ទី​ព្រ័ត្រ​មុនគេ​ប្រើ​ពេល ៤ម៉ោង ២៧នាទី ២៧វិនាទី​តាម​ពីក្រោយ​ដោយ​មិត្ត​រួម​ជាតិ​ប៊ែ​ល​ហ្ស៊ិ​ក Wout van Aert និង​កីឡាករ​ដា​ណឺ​ម៉ាក Mads Pedersen ស្ថិតក្នុង​ថេរវេលា​ដូចគ្នា​។ ​ការប្រកួត​នេះ​ក៏មាន​ការប៉ះទង្គិច​ទ្រង់ទ្រាយ​ធំ​មួយ​ដែរ​នៅ​ចំនុច ៦៥គីឡូម៉ែត្រ​ទៀត​ដល់ទី​ព្រ័ត្រ ដែល​ក្នុងនោះ​ក៏មាន​វត្តមាន​កីឡាករ​ដា​ណឺ​ម៉ាក Jonas Vingegaard ផងដែរ តែ​ក៏បាន​គេ​ចចេញ​ទាល់​ពេលវេលា​ដើម្បី​មកដល់​ទី​ព្រ័ត្រ​ទាន់ពេល និង​រក្សា​ការនាំ​មុខ​ក្នុង​តារាង​រួម​ដដែល​។

​​Jonas Vingegaard នៅពេលនេះ​រក្សា​ការនាំ​មុខ​ចំនួន ២នាទី ២២វិនាទី​ពីលើ​អ្នក​លេខ២ កីឡាករ​ស្លូ​វេ​នី Tadej Pogacar និង​លេខ៣ កីឡាករ​អង់គ្លេស Geraint Thomas យឺត​ជាង ២នាទី ៤៣វិនាទី​។ ​​មិនមាន​ការប្រកួត​ទេ​ក្នុង​ថ្ងៃ​ចន្ទ​នេះ ខណៈ​ថ្ងៃ​អង្គារ​ស្អែក​ចាប់ផ្តើម​ដំណាក់កាល​ទី១៦ ដែលមាន​ចំងាយ​ផ្លូវ ១៧៨.៥គីឡូម៉ែត្រ​។ ​ការប្រកួតប្រណាំង​កង់​លំដាប់ Grand Tour, Tour de France នឹង​បញ្ចប់​ទាំងស្រុង​នៅ​ថ្ងៃទី២៤ ចុង​សប្តាហ៍​នេះ​នៅ​ដំណាក់កាល​ទី២១ ដែល​បញ្ចប់​នៅ​ទីក្រុង​ប៉ារីស​៕

​អត្ថបទ​៖​នាង សុភា​វុ​ធ