ភ្នំពេញ៖ ក្រសួងសុខាភិបាល ជំរុញឱ្យប្រជាពលរដ្ឋធ្វើតេស្តរហ័សដោយខ្លួនឯង នៅពេលមានករណីសង្ស័យផងដែរ ខណៈមានករណីរកឃើញ អូមីក្រុងបំប្លែងថ្មី B.A4 និង BA.5 នៅកម្ពុជាកើតឡើងជាបន្តបន្ទាប់។

កម្ពុជាចាប់តាំងពីថ្ងៃទី ២៨ ខែមិថុនា រហូតមកទល់ពេលនេះ គឺមានការរកឃើញករណីវិជ្ជមាន​កូវីដ១៩ ជារៀងរាល់ថ្ងៃ។ ការរកឃើញករណីឆ្លងជាថ្មីនេះ លេចចេញ​វត្តមាន អូមីក្រុងបំប្លែងថ្មី B.A4 និងBA.5 ដែលជាក្ដីព្រួយបារម្ភផងដែរ។

ក្ដីបារម្ភព្រោះ B.A4 និងBA.5 ​មានលទ្ធភាពឆ្លងលឿនជាងមុន និងមានលទ្ធភាពបញ្រ្ចៀតចូលទៅ​ប្រព័ន្ធភាពស៊ាំ​របស់សារពាង្គកាយរបស់មនុស្សផងដែរ។

លោកជំទាវ ឱ វណ្ណឌីន រដ្ឋលេខាធិការ ​និងអ្នកនាំពាក្យក្រសួងសុខាភិបាល ណែនាំឱ្យប្រជាពលរដ្ឋ​ទាំងអស់ ត្រូវទៅទទួលការចាក់វ៉ាក់សាំង ​ជាពិសេសដូសជំរុញឱ្យបាន​ត្រឹមត្រូវ​តាមកាលកំណត់ ក្នុង​រយៈពេលគម្លាត ៣ខែ​ និងត្រូវរក្សាអនុវត្តវិធានការការពារ ៣ការពារ ៣កុំ ឱ្យបានខ្ជាប់ខ្ជួន។ ទន្ទឹមនឹងវិធានការការពារទាំងនេះ លោកជំទាវ​ បញ្ជាក់ដែរថា ​ការធ្វើតេស្តរហ័សដោយខ្លួនឯង ក៏ជាភាព​ចាំបាច់សម្រាប់បុគ្គលដែលមានរោគសញ្ញា​ រឺភាពសង្ស័យផងដែរ។ លោកជំទាវ លើកឡើងថា ការធ្វើតេស្តរហ័សនេះ ដើម្បីដឹងច្បាស់ពីលទ្ធផល ឆាប់ទទួលបានការព្យាបាល ចៀសផុតពីការឈានទៅភាពធ្ងន់ធ្ងរ។

ពាក់ព័ន្ធនឹងអូមីក្រុងបំប្លែងថ្មី B.A4 និងBA.5 លោកជំទាវ ឱ វណ្ណឌីន ​ធ្លាប់បានបញ្ជាក់ដែរថា បុគ្គល​ដែលឆ្លង គឺមានរោគសញ្ញាមិនខុសប្លែកគ្នាពី ប្រភេទកូវីដ ​ជំនាន់មុនៗនោះទេ។ រោគសញ្ញាមានដូចជា ក្ដៅខ្លួន ក្អក ឈឺបំពង់ក ហៀរសំបោរ មានភាពស្រដៀងទៅនឹងជំងឺ ផ្ដាសាយធម្មតា។

លោកជំទាវបញ្ជាក់ដែរថា ការឆ្លងអូមីក្រុងប្រភេទថ្មីនេះ ​មានលទ្ធភាពធ្វើឱ្យអ្នកជំងឺ ឈានទៅ​ភាពធ្ងន់ធ្ងរ ​ប្រសិនបើមិនមានវ៉ាក់សាំងការពារខ្លួន ​និងមិនអនុវត្តតាមនិតិវិធីព្យាបាល ព្រមទាំង​ការការពារខ្លួនបានត្រឹមត្រូវទេនោះ។ ​ក្រោមហេតុផលទាំងនេះ ​ទើបទាមទារឱ្យ មានការចាក់វ៉ាក់​សាំងដូសជំរុញក្នុងគម្លាត រយៈពេល ៣ខែ៕អត្ថបទ៖ គឹមហុក