​រុស្ស៊ី៖ ប្រទេស​រុស្ស៊ី​កាលពី​ថ្ងៃអាទិត្យ​បាន​អះអាងថា ​បាន​បំផ្លាញ​គោលដៅ​យោធា​អ៊ុយ​ក្រែ​នរួមមាន​ទាំង​ប្រព័ន្ធ​បាញ់​គ្រាប់​រ៉ុក្កែត​ HIMARS និង​ទីតាំង​ផ្ទុក​មី​ស៊ី​ល Harpoon ប្រឆាំង​នាវា។​ ​អ្នកនាំពាក្យ​ក្រសួងការពារជាតិ​បាន​និយាយ​ថា អាវុធ​បាញ់​ស៊ី​ប​គោលដៅ​សមត្ថភាព​ខ្ពស់​តាម​អាកាស​រយៈ​ចម្ងាយ​ឆ្ងាយ បាន​បំផ្លាញ​ឃ្លាំង​ផ្ទុក​មី​ស៊ី​ល Harpoon ប្រឆាំង​នាវាដែល​បណ្ដា​ប្រទេស​អង្គការ ​NATO ផ្តល់​មក​ឱ្យ​អ៊ុយ​ក្រែ​ន​។

លោក Igor Konashenkov បាន​អះអាងថា ប្រព័ន្ធ​បាញ់​រ៉ុក្កែត និង​យានយន្ត​ដឹកជញ្ជូន​ប្រព័ន្ធ​បាញ់​មី​ស៊ី​ល ​HIMARS ដែល​ផលិត​នៅ​សហរដ្ឋអាមេរិកត្រូវបាន​បំផ្លាញ​នៅ​ជិត​ក្រុង Krasnoarmiisk។​ ​ក្រសួង​បាន​បញ្ចេញ​វីដេអូ​ដែល​បានបង្ហាញ​ពី​ការវាយប្រហារ​តាម​អាកាស​ លើ​ប្រព័ន្ធ​បាញ់​គ្រាប់​រ៉ុក្កែត​ចល័ត​សមត្ថភាព​ខ្ពស់​។​ ​ទន្ទឹមនឹងនេះ​ការតាំង​ពិព័រណ៌​អាវុធ​ដែល​រឹបអូស​បាន​ពី​កងកម្លាំងប្រដាប់អាវុធ​អ៊ុយ​ក្រែ​ន ​បាន​បើក​សម្រាប់​អ្នកទស្សនា​នៅ​ទីក្រុង​កំពង់ផែ Mariupol។ រថពាសដែក សព្វាវុធ និង​យុទ្ធោបករណ៍​ផ្សេង​ទៀត​ត្រូវ​បាន​ដាក់​តាំង​បង្ហាញ​។

លោក Vladimir ជា​សមាជិក​ម្នាក់​នៃ​យោធា​តំបន់​ផ្តាច់ខ្លួន​នៅ​ខេត្ត Donetsk បាន​និយាយថា​ សរុបមក​វា​គឺជា​ជ័យភណ្ឌ​ដែល​ត្រូវ​បាន​ជ្រើសរើស​ភាគច្រើន​ ក្នុង​អំឡុង​ពេល​ការ​វាយ​លុក​នៅ​រោងចក្រ Ilyich និង​រោងចក្រ Azovstal ដែល​ត្រូវ​បាន​យក​មក​ដាក់​តាំង​បង្ហាញ​នេះ​។ ឧបករណ៍​ពី​រោងចក្រ Azovstal គ្មាន​ការខូចខាត​ច្រើន ឬ​ខូច​តិច យើង​បាន​យក​មក​ជួសជុលឡើងវិញ៕

អត្ថបទ៖ ប៊ុនថន