ភ្នំពេញ៖ អ្នកពាក់ព័ន្ធ ដែលធ្វើការងារលើវិស័យទេសចរណ៍ បានជំរុញអ្នកប្រកបរបរធ្វើអាជីវកម្ម​ទេសចរណ៍ ត្រូវរៀបចំទីតាំងរបស់ខ្លួនឲ្យមានលក្ខណៈស្ដង់ដារ ​មានភាពទាក់ទាញ បើទោះបី​បច្ចុប្បន្ន​កម្ពុជាសម្បូរទៅដោយទេសចរណ៍ក្នុងស្រុក ​ហើយកុំលក់ផលិតផលលួចបន្លំ ។

លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ថា ក្រោយ​ពី​ស្ថានភាពជំងឺកូវីដ-១៩ នៅក្នុងប្រទេសកម្ពុជាមានភាពធូរស្រាល ទេសចរណ៍ចាប់ផ្ដើមមាន​បណ្ដើរៗ ពិសេសទេសចរណ៍ក្នុងស្រុក បានកើនឡើងគួរសម ហើយទន្ទឹមនេះ ក៏មានពលរដ្ឋខ្មែរ​ជាច្រើន បានធ្វើដំណើរកម្សាន្តទៅក្រៅប្រទេស​ មានទាំងតាមជើងយន្តហោះ ​និងតាមរថយន្ត ។

លោកជំទាវបន្តថា ខណៈកំណើនទេសចរណ៍កំពុងកើនឡើងនេះ សេវាកម្មទេសចរណ៍ផ្នែក​ឯកជនគួរតែរៀបចំសេវាកម្ម ផលិតផលរបស់ខ្លួន ឲ្យមានគុណភាព មានស្ដង់ដារ ទោះបីជា​សម្បូរទៅដោយភ្ញៀវក្នុងស្រុក ដោយភ្ញៀវមួយចំនួន បានទទួលបទពិសោធន៍ នៅក្រៅប្រទេស ដូចនេះតម្រូវការរបស់ពួកគេ កាន់តែខ្ពស់ទៅៗ ហើយការធ្វើបែបនេះ ក៏ជួយមិនឲ្យទេសចរណ៍ខ្មែរចេញទៅលេងក្រៅប្រទេសច្រើន ៕ អត្ថបទ បាន សុខរិទ្ធិ