ភ្នំពេញ៖ បើទោះបីបច្ចុប្បន្នស្ថានភាពអ្នកជំងឺកូវីដ-១៩ សម្រាកព្យាបាលតាមផ្ទះ ក្នុងភូមិសាស្រ្តរាជធានីភ្នំពេញ មិនមានភាពធ្ងន់ធ្ងរក្តី តែអាជ្ញាធររាជធានីភ្នំពេញ នៅតែបន្តយកចិត្តទុកការថែទាំងសុខភាពពួកគេជាប់ ជាប្រចាំ។
លោក កើត ឆែ អភិបាលរង នៃគណៈអភិបាលរាជធានីភ្នំពេញ នៅថ្ងៃទី១៨ ខែកក្កដានេះ បានប្រាប់BTVឲ្យដឹងថា គិតចាប់ពីថ្ងៃទី២៨ ខែមិថុនា រហូតដល់ថ្ងៃទី១៧ ខែកក្កដា នេះ អ្នកសម្រាកព្យាល បាលតាមផ្ទះនៅភ្នំពេញ មានចំនួន៤០នាក់ នៅមន្ទីរពេទ្យចំនួន១១នាក់ និងពលរដ្ឋមួយចំនួនទៀត មិនបានប្រកាសថា ឆ្លងជំងឺកូវីដ-១៩ផងដែរ។
សម្រាប់ស្ថានភាពពួកគេវិញ គឺមិនមានភាពធ្ងន់ធ្ងរនោះទេ ព្រោះ ពួកគេទទួលបានវ៉ាក់សាំងជាច្រើនដូសរួចរាល់ បើទោះបីស្ថានភាពពួកគាត់មិនធ្ងន់ធ្ងរ តែអាជ្ញាធរមូលដ្ឋាន ក្នុងរាជធានីភ្នំពេញ នៅតែបន្តយកចិត្តទុកថែទាំសុខភាពពួកគេជាប់ជាប្រចាំ ដោយបង្កើតជាក្រុម ដើម្បី ឆ្លងឆ្លើយ រវាងគ្រូពេទ្យ និងអ្នកជំងឺកូវីដ-១៩។
ប្រជាពលរដ្ឋ បានលើកឡើងដែរថា បន្ទាប់ពីមានការឆ្លងជំងឺកូវីដសាឡើងវិញនេះ មានអារម្មណ៍ ភ័យខ្លាចដែរ តែមិនខ្លាចខ្លាំងដូចមុននោះទេ ព្រោះបានចាក់វ៉ាក់សាំងច្រើនដូសរួចរាល់ហើយ។
កន្លងទៅលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានមានប្រសាសន៍ថា ប្រមុខរាជរដ្ឋាភិបាលកម្ពុជា បានសម្រេចឱ្យអ្នកជំងឺកូវីដ-១៩ គ្រប់ប្រភេទ រួមទាំងអ្នកជំងឺ ដែលឆ្លងវីរុសកូវីដបំប្លែងថ្មីប្រភេទអូមីក្រុង អាចសម្រាកព្យាបាលនៅតាមផ្ទះបាន ដោយត្រូវយក ចិត្តទុកដាក់អនុវត្តឱ្យបានត្រឹមត្រូវតាមគោលការណ៍ប្រតិបត្តិ (SOP) ដែលណែនាំដោយគណៈកម្មការ អន្តរក្រសួងប្រយុទ្ធនឹងជំងឺកូវីដ-១៩ ក៏ដូចជាក្រសួងសុខាភិបាល។
លោកជំទាវ បានក្រើនរម្លឹកដល់លប្រជាពលរដ្ឋ ដែលសម្រាកព្យាបាលនៅផ្ទះ មេត្តាបន្តរក្សាការ នៅដាច់ដោយឡែកពីក្រុមគ្រួសារឱ្យបានហ្មត់ចត់ជាទីបំផុត ដើម្បីចៀសវាងនូវការចម្លងបន្តទៀតក្នុងក្រុមគ្រួសាររបស់ខ្លួន និងត្រូវថែទាំសុខភាពឱ្យបានល្អ កុំឱ្យមានការចម្លងបន្តគ្នាពីបុគ្គលទៅក្រុមគ្រួសារ និងពី បុគ្គលទៅក្នុងសហគមន៍៕ អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
