​អឺរ៉ុប៖ រដ្ឋមន្ត្រីការបរទេស​សហភាព​អឺរ៉ុបបាន​សន្យាថា​ នឹង​ផ្តល់ជំនួយ​យោធា​ចំនួន 500លាន​អឺរ៉ូ​បន្ថែម​ទៀត​ដល់សង្គ្រាម​របស់​អ៊ុយ​ក្រែ​ន​ដើម្បី​ពង្រឹង​ការ​ការពារ​ជាតិ ខណៈ​ប្រធាន​គោល​នយោបាយ​ការបរទេស​របស់​ប្លុក​នេះ ​បាន​ក្រើនរំលឹក​ប្រទេស​ជា​សមាជិក​កុំឱ្យ​ងាក​ចេញពី​ការ​ប្តេជ្ញា​ចិត្ត​របស់​ពួកគេ ​ចំពោះ​ទណ្ឌកម្ម​ដែល​បានដាក់​លើ​រុស្ស៊ី​។​

​ការសម្រេច​ផ្តល់ជំនួយ​នេះបាន​ធ្វើឡើង​ បន្ទាប់ពី​មានការ​ពិភាក្សា​តាម​វីដេអូ​លើ​ការ​វិវឌ្ឍន៍​ថ្មី​បង្អស់​របស់​រដ្ឋមន្ត្រីការបរទេស​អ៊ុយ​ក្រែ​នលោក Dmytro Kuleba ដែល​បាន​អរគុណ​ចំពោះ​មូលនិធិ​ថ្មី​នេះ ហើយ​នេះ​បាន​នាំឱ្យ​សហភាព​អឺរ៉ុប​ផ្តល់​មូលនិធិ​សរុប​រហូតដល់ 2.5ពាន់​លាន​អឺរ៉ូ ប៉ុន្តែ​នៅតែ​ជំរុញ​ឱ្យ​ប្លុក​ប្រទេស​ទាំង 27 ផ្តល់ជំនួយ​បន្ថែមទៀត​។​ ​ប្រធាន​គោលនយោបាយ​ការបរទេស​សហភាព​អឺរ៉ុបលោក Josep Borrell បាន​និយាយថា ការសម្រេច​បន្ត​គាំទ្រ​អ៊ុយ​ក្រែ​ន​គឺជា​ការរួម​មតិ​គ្នា ប៉ុន្តែ​បាន​និយាយថា​ អ្វីដែល​នៅ​សេសសល់​ក្នុង​សហភាព​អឺរ៉ុបគឺ​សាមគ្គីភាព​នៃ​គោលបំណង ​ដើម្បី​ឲ្យ​ប្រាកដថាកញ្ចប់​ទណ្ឌកម្ម​ដែល​ផ្តោតលើ​ទីក្រុង​មូ​ស្គូនឹង​ដំណើរការ​ទៅបាន​។ កាលពី​ថ្ងៃ​ចន្ទលោក Josep Borrell បាន​និយាយ​ព្រលះ​អ្នក​រិះគន់​ដែល​បាន​អះអាងថា វិធានការ​ដែលមាន​ចាប់ពី​ទណ្ឌកម្ម​លើ​ប្រេងឥន្ធនៈ រហូតដល់​វិធានការ​រូបិយវត្ថុ​គឺ​បានធ្វើ​ឲ្យ​ខូចប្រយោជន៍ និង​ធ្វើ​ឲ្យ​ប៉ះពាល់​ដល់​សហភាព​អឺរ៉ុប​ជាង​រុស្ស៊ី​ទៅទៀត​។​

​លោក​បាន​និយាយ​ក្នុងអំឡុង​សន្និសីទ​សារព័ត៌​មាននៅ​ទីក្រុង​ប្រ៊ុ​ច​សែ​ល​ថា មនុស្ស​ជាច្រើន​ចាត់ទុកថា ​នៅពេលអនុម័ត​ទណ្ឌកម្ម​សហភាព​អឺរ៉ុប​បាន​បង្កើត​បញ្ហា​មួយដែល​បង្កឱ្យមាន​ការឡើង​ថ្លៃ​ប្រេង ដែលនេះ​ជា​រឿង​មិន​ពិតទាំងស្រុង​។ អ្នក​រិះគន់​ដូចជា​នាយករដ្ឋមន្ត្រី​​ហុង​គ្រីលោក Viktor Orban កាលពី​សប្តាហ៍​មុន​បាន​អះអាងថា​ សហភាពអឺរ៉ុប​បាន​រើសយក​បញ្ហា​មក​ដាក់ខ្លួន​ដោយ​កញ្ចប់​ទណ្ឌកម្ម​ទាំង​ប្រាំមួយ៕

អត្ថបទ៖ ប៊ុនថន