ភ្នំពេញ៖ ក្រុមគ្រូពេទ្យការិយាល័យស្រុកប្រតិបតិ្តចតុមុខ(ហៅកាត់ OD ចតុមុខ) នៃមនី្ទរសុខាភិបាលរាជធានីភ្នំពេញ បានចុះចាក់វ៉ាក់សាំងជំងឺកូវីដ-១៩ ជូនប្រជាពលរដ្ឋ និងវ៉ាក់សាំងបង្ការជំងឺ១១ មុខដល់កុមារ រស់នៅតាមសហគមន៍ខ្នងផ្ទះប្រជាពលរដ្ឋ ខណ្ឌទួលគោក។

លោក ប៉ាវ សំអាត អ្នកសម្របសម្រួលទូទៅនៃដំណើរការចាក់វ៉ាក់សាំងបង្ការជំងឺកូវីដ-១៩ មណ្ឌលសុខភាពទួលគោក ប្រាប់BTV នាព្រឹកថ្ងៃទី២០ ខែកក្កដា ឆ្នាំ២០២២នេះ ថា ក្រុមការងារគ្រូពេទ្យការិយាល័យស្រុកប្រតិបតិ្តចតុមុខ បានសហការជាមួយអាជ្ញាធរមូលដ្ឋានភូមិ សង្កាត់ ខណ្ឌ បន្តយុទ្ធនាការចុះចាក់វ៉ាក់សាំងបង្ការជំងឺកូវីដ-១៩ ​ដូសមូលដ្ឋាន និងដូសជំរុញ ជូន​ប្រជាពលរដ្ឋ និងចាក់វ៉ាក់សាំងបង្ការជំងឺ១១មុខ ជូនកុមារ ចាប់ផ្តើមពីថ្ងៃទី១៤ ខែកក្កដា រហូតមក​ដល់ពេលនេះ នៅតាមសហគមន៍ ខ្នងផ្ទះខណ្ឌទួលគោក ដោយដើរពីផ្ទះមួយទៅផ្ទះមួយ​ក៏ជាដូចជា​នៅតាមសាលារៀន ផ្សារ តំបន់រោងចក្រ និងទីប្រជុំជននានា ដោយចាក់វ៉ាក់សាំង​បង្ការជំងឺ ជូនកុមារ យុវវ័យ និងប្រជាពលរដ្ឋ ឲ្យបានចំនួនច្រើនលឿនបំផុត និងគ្រប់ៗគ្នា។

លោក ទេព ចែម ចៅរងទី១ សង្កាត់ផ្សារដើមគរ ក្នុងនាមប្រជាពលរដ្ឋ សូមថ្លែងអំណរគុណ​ដល់​ក្រុមការងារ​គ្រូពេទ្យ ដែលចុះមកដល់មូលដ្ឋានសង្កាត់ផ្សារដើមគរ ក្នុងនោះចាក់វ៉ាក់សាំងកូវីដ១៩ ដែលមានអាយុចាប់ពី៣ឆ្នាំ​ រហូតដល់អាយុ១៨ឡើង និងចាក់វ៉ាក់សាំងបង្ការជំងឺ១១ជូនកុមារ គឺមានអាយុ​ចាប់ពីកើត រហូតដល់អាយុ៥ឆ្នាំ។

ទន្ទឹមនឹងនោះប្រជាពលរដ្ឋមកចាក់វ៉ាក់សាំងបង្ការជំងឺកូវីដ-១៩ បានបង្ហាញពីកី្តសប្បាយរីករាយ​ដែល​មានក្រុមគ្រូពេទ្យចុះមកចាក់វ៉ាក់សាំងដល់ផ្ទះ ​និងសូមគោរពអរគុណដល់លោកគ្រូពេទ្យ អ្នកគ្រូពេទ្យ ជាពិសេសប្រមុខរាជរដ្ឋាភិបាល ដែលគិតគូរពីសុខភាពរបស់ពួកគាត់។

ក្រុមការងារគ្រូពេទ្យ ប្តេជ្ញាចិត្តមិនខ្លាចនឿយហត់ ចូលរួមចាក់វ៉ាក់សាំងបង្ការជំងឺកូវីដ-១៩ និងវ៉ាក់សាំងបង្ការជំងឺ១១មុខ ជូនកុមារ យុវវ័យ និងប្រជាពលរដ្ឋ ឲ្យបានចំនួនច្រើនលឿនបំផុត និងគ្រប់ៗគ្នា ដើម្បីជំរុញវិធានការការពារទប់ស្កាត់ និងឆ្លើយតបការរាលដាលនៃជំងឺកូវីដ-១៩៕អត្ថបទ៖ រដ្ឋា