ភ្នំពេញ៖ មន្ត្រីជំនាញ នៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានបន្តជួយ​បណ្ដុះ​បណ្ដាល ជំនាញសំអាតមីន ​និងយុទ្ធភណ្ឌមិនទាន់ផ្ទុះដែលបន្សល់ទុកពីសម័យ ​សង្គ្រាម ទៅដល់​សិក្ខាកាមមកពីអង្គការ Humanity & Inclusion (HI) ប្រចាំប្រទេសមីយ៉ាន់ម៉ា ។

ក្នុងពិធីជួបសម្ដែងការគួរសម ពីសំណាក់សិក្ខាកាមអង្គការ HI នៅថ្ងៃទី២០ ខែកក្កដា ឆ្នាំ២០២២ ឯកឧត្តម ហេង រតនា អគ្គនាយកស៊ីម៉ាក់ មានប្រសាសន៍ថា នារយៈពេលប៉ុន្មានឆ្នាំចុងក្រោយនេះ មន្ត្រីជំនាញ​ស៊ីម៉ាក់ បានជួយបណ្ដុះបណ្ដាល​ហ្វឹកហ្វឺន ​ជំនាញបោសសំអាតមីន ដល់មន្ត្រី នៃ​ប្រទេស​ជាច្រើននៅលើពិភពលោក​ បាននិងកំពុងប្រឈមបញ្ហាកាកសំណល់ពីសង្គ្រាម តែងបង្កគ្រោះថ្នាក់ដល់មនុស្សសត្វ ។

ឯកឧត្តម បន្តថា ប្រទេសដែលមន្ត្រីស៊ីម៉ាក់ជួយបណ្ដុះបណ្ដាលការងារបោស​សំអាតមីន គឺមាន​ដូចជា ប្រទេសកូឡំប៊ី អង់កូឡា អ៊ីរ៉ាក់ អាហ្កានីស្ថាន ឡាវ​ និងប្រទេសមួយចំនួនទៀត ករណី​ខ្លះ​មកសិក្សាផ្ទាល់នៅកម្ពុជា ​និងករណីខ្លះ ស៊ីម៉ាក់បញ្ជូនគ្រូទៅបង្រៀនប្រទេសគេ ហើយប្រទេស​ខ្លះទៀត មានការដោះដូរនូវ​បទពិសោធន៍​ដល់គ្នា ​ហើយរួមទាំងបានជួយហ្វឹកហាត់លើការបោស​សំអាតមីន​ ដោយសត្វសុនខផងដែរ ។

ឯកឧត្តម ហេង រតនា បានបន្ថែមថា ជាក់ស្ដែងមន្ត្រីជំនាញស៊ីម៉ាក់ ទើប​បញ្ចប់​វគ្គ​ហ្វឹកហ្វឺន​ទៅ​មន្ត្រី​កូឡុំប៊ី មានខាងកងទ័ពជើងគោក ជើងទឹក ជើងអាកាស ​ក្រសួងការពារជាតិ និងតំណាង​មជ្ឈមណ្ឌល​កំចាត់មីនកូឡុំប៊ី សរុបចំនួន១៥នាក់ ខណៈការជួយហ្វឹកហ្វឺននេះ​ តាំងពីឆ្នាំ២០១០ សរុបសិក្ខាកាម​ចំនួនជិត ២០០នាក់​ ក្រោមជំនួយគាំទ្រពីអង្គការចៃកា របស់ជប៉ុន ។

អគ្គនាយកស៊ីម៉ាក់ បានបន្ថែមថា ​សម្រាប់ការបណ្ដុះបណ្ដាល​ដល់សិក្ខាកាមរបស់អង្គការ HI ចំនួន ១០នាក់ (ស្រី៤នាក់) ក្នុងនោះមន្ត្រីជំនាញស៊ីម៉ាក់ ​នឹងផ្តល់ការហ្វឹកហ្វឺនលើផ្នែក “ការស្រាវជ្រាវ មិន​បច្ចេកទេស (Non-Technical Survey)” ដើម្បីពង្រឹង ​និងបង្កើនសមត្ថភាព និង​ទទួល​បានបទ​ពិសោធន៍ថ្មីៗ​បន្ថែមទៀត​ ក្នុងវិស័យសកម្មភាពមីន ​ ដើម្បីគាំទ្រកិច្ចប្រតិបត្តិការខ្លួន នៅក្នុងប្រទេសមីយ៉ាន់ម៉ា ។

គួរបញ្ជាក់ាថា វគ្គហ្វឹកហ្វឺននេះ មានរយៈ ពេល៩ថ្ងៃ គឺចាប់ពី ​ថ្ងៃទី២០ ដល់ថ្ងៃទី២៩ ខែកក្កដា ឆ្នាំ២០២២ ​នឹងប្រព្រឹត្តទៅនៅសារមន្ទីសន្តិភាពខេត្តសៀមរាប ​ហើយវគ្គ​ហ្វឹកហ្វឺន​នេះ មាន​គ្រូបង្គោលចូលរួមហ្វឹកហាត់ ៕ អត្ថបទ បាន សុខរិទ្ធិ