ឧត្តរមានជ័យ៖ មន្ទីរកិច្ចការនារីខេត្តឧត្ដរមានជ័យ បានបើកកិច្ចប្រជុំបណ្តាញការងារយេនឌ័រ​ថ្នាក់ខេត្តប្រចាំឆមាសទី១ ឆ្នាំ២០២២ ក្នុងគោលបំណង ដើម្បីចែករំលែកនូវព័ត៌មាន និងបទ​ពិសោធន៍​លើការអនុវត្តការងារបញ្ជ្រាបយេនឌ័រ និងបង្កើនភាព​អង់អាច​ដល់ស្ត្រី របស់អង្គភាព មន្ទីរវិស័យ ​អង្គការដៃគូពាក់ព័ន្ធនានាក្នុងខេត្ត ដើម្បីលើក​ជា​អនុសាសន៍​ល្អៗសម្រាប់គាំទ្រ​បន្តនៅថ្នាក់ក្រោមជាតិ។

លោកស្រី ឯក សុភារុំ ប្រធានមន្ទីរកិច្ចការនារីខេត្តឧត្ដរមានជ័យ ​បានលើកឡើងថា គោលបំណងនៃ​កិច្ចប្រជុំនេះ គឺ​ដើម្បីរំលេចពីតម្លៃនៃសន្តិភាព​និងការបញ្ជ្រាប​យេនឌ័រដល់ថ្នាក់ក្រោមជាតិ ដែល​រាជរដ្ឋាភិបាលបាននឹងកំពុងគាំទ្រ ជំរុញឲ្យមានការចូលរួមយ៉ាងសកម្មពីគ្រប់ស្ថាប័ននានា ​ទាំងបុរស និងស្ត្រី ដើម្បីវឌ្ឍនភាពសង្គម ក្នុងការលើកកម្ពស់សិទ្ធិ ស្ថានភាព ជីវភាព ឋានៈ តួនាទី របស់ស្ត្រី ក៏ដូចជាសុខមាលភាពផងដែរ។

ក្នុងឱកាសនោះ លោកជំទាវ មុំ ពុទ្ធីតា អភិបាលរងខេត្តឧត្ដរមានជ័យ លើកឡើងថា រាជរដ្ឋាភិបាល​ក្រោម​ការដឹកនាំប្រកបដោយ​គតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បានដាក់​ចេញ​នូវគោលដៅជាយុទ្ធសាស្ត្រយ៉ាងច្បាស់ពីសារៈសំខាន់នៃការលើកកម្ពស់សមភាពយេនឌ័រ ដូចបាន​កំណត់ក្នុងយុទ្ធសាស្រ្តចតុកោណ ដំណាក់កាល ទី១ ទី២ ទី៣ និងទី៤ ដែលបានចាត់ទុកថា “ស្រ្តីគឺជាឆ្អឹងខ្នងនៃការអភិវឌ្ឍសេដ្ឋកិច្ចសង្គមជាតិ” ក្នុងន័យនេះ រាជរដ្ឋាភិបាល កំពុង យកចិត្ត​ទុកដាក់​យ៉ាងខ្លាំង ក្នុងការអនុវត្តគោលនយោបាយលើកកម្ពស់​សមភាពយេនឌ័រ និង​បង្កើនភាព​អង់អាច​ដល់ស្ត្រី។

លោកជំទាវ អភិបាលរងខេត្ត ក៏បានផ្ដាំផ្ញើរដល់ស្ថាប័ន និងអង្គការដៃគូរអភិវឌ្ឍពាក់ព័ន្ធនានា រួមទាំង​អាជ្ញាធរមូលដ្ឋានទាំងអស់ ​ត្រូវយកចិត្តទុកដាក់សហការណ៍គាំទ្រជំរុញ ការអនុវត្តការងារ​បញ្ជ្រាប​យេនឌ័រ និងបង្កើនភាពអង់អាចដល់ស្ត្រី ​តាមវិស័យនឹងរូបភាពផ្សេងៗ ក្នុងអង្គភាពរបស់ខ្លួន អោយកាន់​តែមានប្រសិទ្ធភាពខ្ពស់បន្ថែមទៀតផងដែរ៕ អត្ថបទ៖ សារិទ្ធិ