​អ៊ីរ៉ង់៖ ប្រធានាធិបតី​រុស្ស៊ី​លោក Vladimir Putin បាន​ជួបប្រជុំ​ក្នុងប្រទេស​អ៊ីរ៉ង់​កាលពី​ថ្ងៃ​អង្គារ ដោយ​ស្វែងរក​ការធ្វើឱ្យ​ទំនាក់ទំនង​កាន់តែ​ស៊ីជម្រៅ ជា​ផ្នែក​មួយ​នៃ​ការ​ប្រជែង​របស់​ទីក្រុង​មូ​ស្គូ​ចំពោះ​សហរដ្ឋអាមេរិក និង​សហភាព​អឺរ៉ុបក្នុង​ពេល​យុទ្ធនាការ​របស់ខ្លួន​នៅ​អ៊ុយ​ក្រែ​ន​។

នៅក្នុង​ដំណើរ​ទស្សនកិច្ច​ជា​លើក​ទី២ ​របស់លោក​នៅក្រៅ​ប្រទេស​ ចាប់តាំងពី​ប្រទេស​រុស្ស៊ី​បាន​ចាប់ផ្តើមប្រតិបត្តិការ​សឹក​ពិសេសនៅក្នុង​ខែកុម្ភៈ លោក Putin បាន​ជួប​ជាមួយ​ប្រធានាធិបតី​អ៊ីរ៉ង់​លោក Ebrahim Raisi និង​ប្រធានាធិបតី​ទួរគីលោក​ Recep Tayyip Erdogan លើ​បញ្ហា​ដែល​កំពុង​ប្រឈម​ក្នុង​តំបន់ រួមទាំង​ជម្លោះ​នៅក្នុង​ប្រទេស​ស៊ី​រី និង​សំណើ​ដែល​គាំទ្រ​ដោយ​អង្គការសហប្រជាជាតិ​ ដើម្បី​បន្ត​ការនាំចេញ​គ្រាប់​ធញ្ញជាតិ​អ៊ុយ​ក្រែ​ន ក្នុងការ​បន្ធូរបន្ថយ​វិបត្តិ​ស្បៀងអាហារ​ពិភពលោក​។​ ប្រធានាធិបតី​រុស្ស៊ីលោក Vladimir Putin បាន​អះអាង​កាលពី​ថ្ងៃ​អង្គា​រថា ប្រទេស​អ៊ុយ​ក្រែ​ន​បាន​បដិសេធ​មិន​គោរព​តាម​កិច្ចព្រមព្រៀង ​ដែល​ត្រូវបាន​ឈានដល់​ក្នុងអំឡុង​កិច្ចពិភាក្សា​នៅក្នុង​ប្រទេស​ទួរគី​កាលពី​ខែមីនា​។ ថ្លែង​នៅក្នុង​សន្និសីទ​សារព័ត៌មាន​ជាមួយ​អ្នកសារព័ត៌មាន​រុស្ស៊ី​នៅ​ទីក្រុង​តេ​អេ​រ៉ង់ លោក ​Putin បាន​ចោទប្រកាន់​ប្រទេស​អ៊ុយ​ក្រែ​ន​ថា ​បាន​បដិសេធ​មិន​អនុវត្ត​លក្ខខណ្ឌ​មួយចំនួន​។

នៅពេល​សួរថា តើ​កិច្ចចរចា​ជាមួយ​អ៊ុយ​ក្រែ​ន​លើ​ដំណោះស្រាយ​នយោបាយ​អាច​បន្ត​ដែរឬទេ លោក ​Putin បាន​និយាយថា យើង​កំពុង​មើលឃើញថា​ អាជ្ញាធរ​ទីក្រុង Kyiv គ្មាន​បំណង​ចង់បាន​បែបនេះ​ទេ​។ បន្ទាប់មក​លោក Putin បាន​និយាយថា ទីក្រុង​មូ​ស្គូ​នឹង​ទទួលយក​កិច្ចព្រមព្រៀង​មួយ​ ដើម្បី​ជួយ​សម្រួល​ដល់​ការដឹកជញ្ជូន​គ្រាប់​ធញ្ញជាតិ​របស់​អ៊ុយ​ក្រែ​ន ប្រសិនបើ​ប្រទេស​លោកខាងលិច​លុបចោល​ការ​រឹតត្បិត​លើ​ការនាំចេញ​គ្រាប់​ធញ្ញជាតិ​របស់​រុស្ស៊ី​។ មន្ត្រី​អង្គការសហប្រជាជាតិ រុស្ស៊ី អ៊ុយ​ក្រែ​ន និង​ទួរគីបាន​ឈានដល់​កិច្ចព្រមព្រៀង​បណ្តោះអាសន្ន​មួយ ដើម្បី​ធានាបាន​ការនាំចេញ​គ្រាប់​ធញ្ញជាតិ និង​ផលិតផល​កសិកម្ម​ផ្សេងទៀត​ដែល​ត្រូវការចំនួន ២២លាន​តោន ខណៈ​នៅជាប់​គាំង​នៅក្នុង​កំពង់ផែ​សមុទ្រ​ខ្មៅ​របស់​អ៊ុយ​ក្រែ​ន​។ ការ​ឈានដល់​កិច្ចព្រមព្រៀង​នេះ​នឹង​បង្ហាញ​ពី​ជំហាន​ដ៏​សំខាន់​មួយ​ ឆ្ពោះទៅរក​ការបន្ធូរបន្ថយ​វិបត្តិ​ស្បៀងអាហារ​ពិភពលោក ដែល​បានធ្វើឱ្យ​តម្លៃ​ទំនិញ​សំខាន់ៗ​ដូចជា​ស្រូវ​សាលី និង​ស្រូវ​បាលី​កើនឡើង​តម្លៃ៕

អត្ថបទ៖ ប៊ុនថន