តាកែវ៖ នាយកភ្នាក់ងារភីសខ័រសហរដ្ឋអាមេរិកប្រចាំនៅកម្ពុជា លោក ម៉ៃខល ហឺរីងតុន បានប្រាប់អភិបាលខេត្តតាកែវថា ភ្នាក់ងារភីសខ័រប្រចាំនៅប្រទេសកម្ពុជា មានគម្រោងរៀបចំបើកវគ្គបណ្តុះបណ្តាលដល់អ្នកស័គ្រ្មចិត្តក្រុមទី១៤ ចំនួន៣០នាក់ ដែលជាជនជនអាមេរិកាំង រយៈពេល១០សប្តាហ៍នៅស្រុកបាទី ខេត្តតាកែវ។

នៅក្នុងឱកាសចូលជួបសម្តែងការគួរសមជាមួយអភិបាលខេត្តតាកែវ ឯកឧត្តម អ៊ូច ភា នៅព្រឹកថ្ងៃ ទី២០ ខែកក្កដា នេះ ដើម្បីស្នើសុំការគាំទ្រកិច្ចសហប្រតិបត្តិការកម្មវិធី​បណ្តុះបណ្តាល​អ្នកស្ម័គ្រចិត្ត​ក្រុមទី១៤ លោកនាយកភ្នាក់ងារភីសខ័រ ​បានបញ្ជាក់ថា ​ដោយមើលឃើញថា ខេត្តតាកែវ គឺជាខេត្តដែលមានវប្បធម៌ អរិយធម៌ចំណាស់ជាងគេក្នុងប្រវត្តិសាស្រ្តរបស់ប្រទេសកម្ពុជា ជាពិសេសគឺប្រជាជននៅខេត្តមួយនេះ​ មានភាពរួសរាយរាក់ទាក់ ​មានស្នាមញញឹមច្រើន និង​មានសីលធម៌ផងដែរ វគ្គបណ្តុះបណ្តាលនេះ នឹងផ្តល់ដល់អ្នកស័គ្រ្មចិត្តជនជាតិអាមេរិកនូវ​ចំណេះ​ដឹង​ជាមូលដ្ឋានលើភាសាខ្មែរ វប្បធម៌ ការរក្សាសុខភាព សន្តិសុខ ​សុវត្ថិភាពផ្ទាល់ខ្លួន ស្ថានភាព​អប់រំនៅប្រទេសកម្ពុជា ​និងវិធីសាស្រ្តបង្រៀនភាសាអង់គ្លេស ដោយចាប់ផ្តើមចាប់ពីខែតុលា ដល់ខែធ្នូ ឆ្នាំ២០២២ខាងមុខនេះ។

ឆ្លើយតបទៅនឹងការលើកឡើងរបស់នាយកទីភ្នាក់ងារភីសខ័រប្រចាំកម្ពុជា ឯកឧត្តម អ៊ូច ភា អភិ បាលខេត្តតាកែវ បានសម្តែងនូវការសប្បាយរីករាយ និងស្វាគមន៍ចំពោះក្រុមការងាររបស់​ភ្នាក់ងារ​ភីសខ័រ​ប្រចាំនៅកម្ពុជា ​ដែលបានរៀបចំបើកវគ្គបណ្តុះបណ្តាលដល់អ្នកស័គ្រ្មចិត្តក្រុមទី១៤ ចំនួន៣០នាក់ ​មកសិក្សាស្វែងយល់អំពីភាសាខ្មែរ វប្បធម៌ ​ក៏ដូចជាស្ថានភាពអប់រំនៅស្រុកបាទី ខេត្តតាកែវ ។

ក្នុងនាមរដ្ឋបាលខេត្ត រដ្ឋបាលស្រុកបាទី ​ក៏ដូចជាមន្ទីរអប់រំយុវជន និងកីឡាខេត្ត និងអ្នកពាក់ព័ន្ធ​ដទៃទៀត ​ឯកឧត្តមអភិបាលខេត្តតាកែវ ​បានលើកឡើងថា នឹងខិតខំប្រឹងប្រែងសហការ​ជួយ​សម្របសម្រួល ធ្វើយ៉ាងណាឱ្យដំណើរការនៃការបើកវគ្គបណ្តុះ​បណ្តាលនេះ ដំណើរការ​ទៅ​ដោយរលូន និងធានាបាននូវសន្តិសុខសុវត្ថិភាព ​ការស្នាក់នៅដល់អ្នកស័គ្រ្មចិត្តទាំង ៣០នាក់​នេះប្រកបដោយភាពជឿជាក់៕អត្ថបទ៖ គុជ វិភាគ