ភ្នំពេញ៖ ឯកឧត្តម ម៉ម ប៊ុនហេង រដ្ឋមន្រី្តក្រសួងសុខាភិបាល បានបញ្ជាក់ថា ក្រុមអ្នកជំនាញរបស់ក្រុមហ៊ុន Sinovac Life Sciences Co.,Ltd កំពុងចុះមកសិក្សាពីមូលដ្ឋានសំណង់ និងបច្ចេកទេសរក្សាទុកវ៉ាក់សាំង និងវេចខ្ចប់វ៉ាក់សាំង នៅព្រះរាជាណាចក្រកម្ពុជា។

ការថ្លែងរបស់ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ប្រាប់BTV ព័ត៌មាន យ៉ាងដូច្នេះនាឱកាសដឹកនាំក្រុមការងារគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ និងចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងដូសជំរុញ ជូនប្រជាពលរដ្ឋ​ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ នាព្រឹកថ្ងៃទី២១ខែកក្កដា ឆ្នាំ២០២២នេះ។

ឯកឧត្តមរដ្ឋមន្រី្ត បានលើកឡើងទៀតថា ក្រុមអ្នកជំនាញរបស់ក្រុមហ៊ុន Sinovac Life Sciences Co.,Ltd កំពុងចុះមកសិក្សាលើទីតាំងនេះ ធ្វើឡើងបន្ទាប់ពីក្រសួងសុខាភិបាល នៃព្រះរាជាណាចក្រ​កម្ពុជា បានរៀបចំពិធីចុះហត្ថលេខាលើអនុស្សរណៈ នៃការយោគយល់គ្នា ស្តីពីកិច្ចសហប្រតិបតិ្តការ​វេចខ្ចប់វ៉ាក់សាំងបង្ការវីរុសកូវីដ-១៩ រវាងសហគ្រាសឱសថកម្ពុជា និងក្រុមហ៊ុន Sinovac Life Sciences នៃសាធារណរដ្ឋប្រជាមានិតចិន ដែលអាចឲ្យកម្ពុជា មានលទ្ធភាពវេចខ្ចប់វ៉ាក់សាំងដោយ​អនុលោម​ទៅតាមនិយាមរបស់សាធារណរដ្ឋប្រជាមានិតចិន។

សូមរំលឹកផងដែរថា​ ពិធីចុះហត្ថលេខាលើអនុស្សរណៈនៃការយោគយល់គ្នា ធ្វើឡើងកាល​ពីព្រឹក​ថ្ងៃទី១ ខែមិថុនា ឆ្នាំ២០២២កន្លងទៅ ក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្ត​ក្រសួងសុខាភិបាល ​ជាមួយឯកឧត្តម Wang Wentian (វ៉ាង វិនធាន) ​ឯកអគ្គរដ្ឋទូតវិសាមញ្ញ និងពេញ​សមត្ថភាពនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា លោកជំទាវ អ្នកឧកញ៉ា ជឹង សុភាព អគ្គនាយិកាសហគ្រាសឱសថកម្ពុជា ​និងលោក Gao Qiangអ្នកគ្រប់គ្រង​ទូទៅ​របស់​ក្រុមហ៊ុន(កៅ ជាំង) Sinovac Life SciencesCo.,Ltd។

ដោយឡែកឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ​បានបញ្ជាក់ដែរថា គម្រោង​វេចខ្ចប់ដំណាក់កាលចុងក្រោយ នៃវ៉ាក់សាំងបង្ការវីរុសកូវីដ-១៩ និងវីរុសបំលែងថ្មីផ្សេងៗ​ទៀត រាជរដ្ឋាភិបាលកម្ពុជា ​បញ្ជាទិញពីសហគ្រាសឱសថកម្ពុជា​ រយៈពេល០៣ឆ្នាំ​ (ឆ្នាំ២០២៤-២០២៦) ​សម្រាប់​ផ្គត់ផ្គង់​តម្រូវការប្រើប្រាស់ក្នុងប្រទេសផងដែរ៕ អត្ថបទ៖ រដ្ឋា